«Ազատություն». ԱՄՆ ընտրյալ նախագահ Դոնալդ Թրամփը հայտարարել է, թե ինքը նոր տեղեկատվություն ունի ամերիկյան ընտրությունների ընթացքում ռուս հաքերների ենթադրյալ միջամտության վերաբերյալ և մտադիր է հաջորդ շաբաթ հրապարակել այն:
Ֆլորիդայում հրավիրած իր ամանորյա խնջույքի ժամանակ լրագրողների հետ ունեցած կարճատև զրույցում Թրամփը, արձագանքելով ռուսական ենթադրյալ հաքերային հարձակումների մասին հարցին, պատասխանել է. – «Ես գիտեմ բաներ, որոնց մասին մարդիկ չգիտեն» և «դուք էլ այդ մասին կիմանաք երեքշաբթի կամ չորեքշաբթի»:
Նա նաև ասել է, որ շարունակում է կարծել, որ ԱՄՆ Դեմոկրատական կուսակցության պաշտոնյաների էլեկտրոնային նամակագրությունը հրապարակած հաքերները Ռուսաստանի հետ կապ չունեն:
Անցյալ շաբաթ ԱՄՆ իշխանությունները 35 ռուս դիվանագետների արտաքսեցին ամերիկյան ընտրություններում ռուս հաքերների ենթադրյալ միջամտության առնչությամբ և նոր պատժամիջոցներ սահմանեցին ռուսաստանյան անվտանգության ծառայությունների նկատմամբ:
Կարդացեք նաև
Ամերիկյան անվտանգության ծառայությունները ավելի վաղ հայտարարել էին, որ իրենց կարծիքով Մոսկվան հրահանգել է հաքերներին քայլեր ձեռնարկել ընտրություններում Թրամփի հաղթանակը ապահովելու համար:
