Օքսֆամի հայաստանյան գրասենյակը դեկտեմբերի 28-ին ամփոփեց «Պարենային
անվտանգության եւ սնուցման մարտահրավերները Հայաստանում» լրագրողական եւ «Առողջ լանչ բոլորի համար» դպրոցականների համար տեսանյութ-դասընթացների մրցույթների արդյունքները:
«Պարենային անվտանգության եւ սնուցման մարտահրավերները Հայաստանում» լրագրողական մրցույթը երեք անվանակարգերի համար էր. Լավագույն հրապարակում տպագիր մամուլում, Լավագույն հրապարակում առցանց լրատվամիջոցներում, Լավագույն վերլուծական ձայն կամ տեսաձայնային նյութ:
Առցանց, տեսաձայնային եւ տպագիր անվանակարգերում հաղթողները որոշվել էին մասնագիտական հանձնաժողովի գնահատականների հիման վրա, մրցանակներ ստացան Տաթև Խաչատրյանը՝ «Հետք»-ի կայքում հրապարակված «Կաթնաշոռ՝ աղիքային ցուպիկով եւ խմորասնկերի, բորբոսասնկերի անթույլատրելի քանակով» նյութի համար, Ալինա Նիկողոսյանը՝ «Սիվիլնեթում» հրապարակված «Ջերմոց, որ աշխատում է ձկների օգնությամբ» տեսանյութի համար, իսկ տպագիր անվանակարգում հաղթողները երկուսն էին՝Աննա Հովհաննիսյանը՝ «Առավոտ»-ում լույս տեսած «Մաստակը, երշիկեղենը, ապխտած ձուկը, յոգուրտները, չիպսերը վտանգավոր կոնսերվանտներ են պարունակում» նյութի համար եւ Սոնա Ադամյանը՝ «Հրապարակ» թերթում տպագրված «Որտեղից է սկսվում եւ որտեղ ավարտվում սննդամթերքի անվտանգությունը» նյութի համար:
«Առողջ լանչ բոլորի համար» մրցույթին ներկայացվել էր 20 տեսանյութ, որոնցում դպրոցահասակ երեխաները պատրաստում էին լանչ դպրոցի համար՝ տեսանկարելով գործընթացը, ինչպես նաեւ մեկնաբանելով: Մրցույթի 3 հաղթողներից մեկը որոշվեց ֆեյսբուքյան հավանությունների քանակով, ըստ որի ավելի քան 2800 հավանության արժանացած տեսանյութի հեղինակ Էրիկ Միրզոյանը իր հարազատ Լճկաձոր համայնք վերադարձավ պլանշետով եւ Օքսֆամի հուշանվերներով:
Մրցույթի մասնագիտական հանձնաժողովի գնահատմամբ, որոշված եւս երկու հաղթողներն էին Լիլիա Կարապետյանը եւ Էվա Պետրոսյանը: Մրցույթին մասնակցած բոլոր դպրոցականները ստացան խրախուսական նվերներ եւ հուշանվերներ՝ ամանորյա բարեմաղթանքներով:
Աննա ՀՈՎՀԱՆՆԻՍՅԱՆ
