«Այս տարին կարեւոր էր, քանի որ ինքնավստահություն ձեռք բերեցինք. Գիքոր հանրապետությունից վերածվեցինք նժդեհական, Վահագնի, հաղթողի, փառավոր, արժանապատիվ պետության»,- դեկտեմբերի 28-ին «Հայելի» մամուլի ակումբում լրագրողների հետ հանդիպման ընթացքում, ամփոփելով տարին, ասաց Գերագույն խորհրդի նախկին պատգամավոր Ազատ Արշակյանը:
Նա նշեց, որ ապրիլյան պատերազմից հետո Հայաստանը ձեռք է բերել հաղթողի ինքնազգացողությունը, որը դեռ 1000 տարի կհերիքի. «Մենք հաղթեցինք՝ մեն-մենակ մնալով թշնամու դեմ»:
Ազատ Արշակյանը անդրադարձավ նաեւ Կարեն Կարապետյանի կառավարությանը. «Հայտնի, կայացած, աշխատանքային փորձ ունեցող, գործն իմացող մեկը վերադարձել է հայրենիք, դա էլ է հետաքրքիր: Եվ նա թարմ ուժերով սկսեց աշխատանքը՝ ոչ գավառական: Գավառական չէր, դրանից առաջ, իմ կարծիքով, գավառամտություն էր, ես համարում եմ, որ մեր կառավարությունը գավառական, գյուղապետարանի կառավարություն էր, գյուղապետարանի ավագանի: Ես մտածում էի՝ քաղաքակիրթ մարդ է եկել եւ այն երկրից է գալիս, որտեղ «պերեստրոյկա» եւ հեղափոխություններ կան:
Հիմա, երբ որ շարք կանգնած, ոնց որ ատամնաբուժարան գնան, մտան Հանրապետական կուսակցություն՝ ատամնազերծ լինելու համար: Հանրապետականը կարծես թե ատամնաբուժարան է, ով մտնում է, կարծես թե առանց ատամ դուրս է գալիս: Ես հույս ունեի, որ Կարեն Կարապետյանը չի մտնի ատամնաբուժարան, բայց մտավ»:
Կարդացեք նաև
Ամի ՉԻՉԱԿՅԱՆ
