Ռուսաստանը և Թուրքիան համաձայնեցրել են Սիրիայում հաշտության համապարփակ ծրագիրը, որը կներկայացվի հակամարտող կողմերին: Այս մասին գրում է թուրքական «Անադոլու» գործակալությունը՝ վկայակոչելով սեփական աղբյուրները:
Հաշտության ծրագիրն ընդգրկում է այն բոլոր շրջանները, որտեղ ռազմական գործողություններ են ընթանում ընդդիմադիր խմբավորումների և կառավարական ուժերի միջև:
Կողմերին կառաջարկվի դադարեցնել ռազմական գործողությունները՝ սկսած դեկտեմբերի 29-ից՝ տեղական ժամանակով ժամը 00:00-ից:
Գործակալությունը նշում է, որ պայմանավորվածությունը չի ազդի ահաբեկչական խմբավորումների վրա՝ չհստակեցնելով, թե որոնք են այդպիսիք:
Կարդացեք նաև
Կայուն հաշտության հասնելու դեպքում Սիրիայի կառավարության և ընդդիմության ներկայացուցիչները Թուրքիայի և Ռուսաստանի միջնորդությամբ Աստանայում կսկսեն քաղաքական բանակցություններ՝ հակամարտության վերջնական լուծման համար: Որպես խաղաղության գործընթացի երաշխավորներ հանդես կգան Մոսկվան և Անկարան:
Հիշեցնենք, ավելի վաղ Ռուսաստանի արտգործնախարար Սերգեյ Լավրովը հայտարարել էր, որ Մոսկվան, Անկարան և Թեհրանը պատրաստ են դառնալ Սիրիայի կառավարության և ընդդիմության միջև պատրաստվող խաղաղության համաձայնության երաշխավորներ:
Պատրաստեց՝ Վիկտորյա ԱՆԴՐԵԱՍՅԱՆԸ
