Ինչպես ավելի վաղ հայտնել էինք, ԵՊՀ իրանագիտության ամբիոնում այսօր կազմակերպվել էր «Թալիշներ. պատմություն և արդիականություն» խորագրով քննարկում՝ հայ եւ թալիշ փորձագետների մասնակցությամբ: «Եթե քաղաքական գնահատական տանք թալիշական շարժմանը, ապա այն ունի տարբեր բեւեռներ՝ ինքնավարության կողմնակիցներից մինչեւ Թալիշստանի կատարյալ անկախության կողմնակիցներ: Կարեւոր է, որ թալիշների քաղաքական վերնախավը գնահատում է հայկական ներդրումը թալիշական քաղաքական շարժումներում եւ գիտական զարգացումներում»,-լրագրողների հետ զրույցում ասաց ԵՊՀ իրանագիտության ամբիոնի վարիչ, իրանագետ Վարդան Ոսկանյանը:
Նրա բնորոշմամբ՝ Երեւանն այն բացառիկ կենտրոնն է, որտեղ զարգանում է թալիշների լեզվի, պատմության եւ մշակույթի ուսումնասիրությունը:
«Կարեւոր աշխատանք է արվում նաեւ թալիշական քաղաքական շարժման համախմբման ուղղությամբ: Կարծում եմ՝ ՀՀ-ն կարողանում է իրեն ներկայացնել որպես տարածաշրջանային գերտերություն եւ դա ամենեւին էլ չափազանցություն չէ, որովհետեւ կարողանում է որոշակի գործընթացներ կառավարել մեզ համար թշնամական Ադրբեջանական հանրապետությունում: Այդ գործընթացները կատարվում են «մի վնասիր» կարեւոր սկզբունքով, որովհետեւ զգացական մոտեցումները պետք է մի կողմ դնել եւ զբաղվել մաքուր գիտությամբ: Վերջինիս կիրառական գործածության համատեքստում հայերը եւ թալիշները տարածաշրջանի հնագույն ժողովուրդներից են: Գիտական փաստարկներն ապացուցում են, որ այդ երկու ժողովուրդները շփվել են մինչեւ տարածաշրջանում թյուրքալեզու տարրի հայտնվելը: Երկու հինավուրց ժողովուրդներն այսօր կարիք ունեն գործակցության, երկխոսության»,-համոզմունք հայտնեց իրանագետը:
Վարդան Ոսկանյանը փաստեց, որ Ալիեւի ռեժիմն աշխատում է թալիշական ինքնությունն «ապամոնտաժելու», նրանց ձուլելու, նաեւ՝ հայերի դեմ օգտագործելու ուղղությամբ. «Թալիշական բնակչության մի մասն Ալիեւյան ռեժիմի կողմից օգտագործվում է հայերիս դեմ՝ որպես «թնդանոթի միս»: Կարծում եմ՝ թալիշ առանցքային գործիչների հետ նոր փուլ սկսելու կարիք ունենք, դա ժողովրդական դիվանագիտության կարեւոր օղակներից է»:
Կարդացեք նաև
Այլ մանրամասները՝ տեսանյութում:
Լուիզա ՍՈՒՔԻԱՍՅԱՆ
