ԵՊՀ իրանագիտության ամբիոնում այսօր կազմակերպվել էր «Թալիշներ. պատմություն և արդիականություն» խորագրով քննարկում՝ հայ և թալիշ փորձագետների, հասարակական-քաղաքական գործիչների մասնակցությամբ: Թալիշ քաղաքական գործիչները տեսակապի միջոցով ներկայացրեցին թալիշների խնդիրները, թալիշական ազգային շարժման նպատակներն ու հեռանկարները: Հիշեցնենք՝ թալիշներն Ադրբեջանի տեղաբնիկ, պետականազուրկ ժողովուրդներից են, որոնք բարձրաձայնում են անկախանալու հարցը:
Թալիշական ազգային շարժման առաջնորդ Ալաքրամ Հումմաթզոդան նշեց, որ թալիշների ձայնն արդեն իսկ լսելի է միջազգային ամբիոններից, թեեւ Ադրբեջանի իշխանությունը փորձում է ճնշել այն. «Մեր շարժումը կողմ է տարածաշրջանում խաղաղության հաստատմանը: Ադրբեջանաբնակ մեր համախոհների եւ աջակիցների թիվը գնալով ավելանում է: Ալիեւի ռեժիմը տեղաբնիկների հանդեպ բռնության քաղաքականություն է վարում, եւ մեր նպատակն է՝ իշխանափոխությունը»:
Ներկայացնելով իրավիճակը, թե ինչպես է Ադրբեջանի բռնապետական ռեժիմը վարվում թալիշների հետ, ՌԴ նախագահին կից ազգամիջյան հարաբերությունների խորհրդի անդամ, «Թալիշական սփյուռք» կազմակերպության նախագահ Իսմայիլ Շաբանովն ասաց. «Թալիշներին սպանում են, բանտարկում, անգամ՝ քիմիական-կենսաբանական պատերազմ վարում նրանց հանդեպ: Արհեստական ճանապարհներով վիրուսներ են տարածում թալիշաբնակ բնակավայրերում՝ այդ կերպ ցեղասպանություն իրականացնելով: Իսկ իրավապահները թալիշներին են վերագրում թմրանյութերի տարածում եւ զենքի վաճառք»:
Կարդացեք նաև
Թալիշ քաղաքական գործիչները նաեւ ընդգծեցին, որ Ադրբեջանում իրենց ցանկացած խաղաղ քաղաքական ակցիա անմիջապես ճնշվում է, իսկ ալիեւյան կլանի հեռացումը ժամանակի հարց է:
Իսմայիլ Շաբանովն իր հերթին անդրադարձավ նաեւ Արցախյան հակամարտությանը՝ նկատելով, որ Արցախի ժողովուրդը ժամանակին անկախության հանրաքվեով խելացի քայլ է կատարել. «Հաջողություն ենք մաղթում նրանց»:
Թե ինչ փուլում է հայ-թալիշական գիտական գործակցությունը, այդ մասին՝ քիչ ուշ:
Լուիզա ՍՈՒՔԻԱՍՅԱՆ
