Օրերս Կապանի բժշկական կենտրոնում ծննդկանի եւ նորածնի մահվան դեպք է գրանցվել: Հարուցվել է քրեական գործ:
Այսօր Aravot.am-ն առողջապահության նախարար Լեւոն Ալթունյանից հետաքրքրվեց՝ արդյոք նախարարը նախկինի պես այն կարծիքին է, որ 1-2 մահվան դեպքով չի զբաղվում, պարզ է, որ իրավապահ մարմիններն էլ պետք է զբաղվեն, բայց արդյոք նախարարությունը չի՞ պատրաստվում վերահսկել բուժծառայությունների որակը: Հիշեցնենք, նախարարն ասել էր՝ «Ես մեկ-երկու մահացած ծննդկանի դեպքով չեմ զբաղվում, դրանով զբաղվում են դատական մարմինները»:
Պարոն Ալթունյանը մեր հարցին ի պատասխան՝ ասաց. «Իհարկե, նախարարությունն ամեն դեպքից հետո իր քայլերն անում էր, եւ անում է, եւ կշարունակի անել: Բայց, որպեսզի կանխենք դեպքերը, մենք որոշեցինք գնալ մի քիչ այլ ճանապարհով եւ Սյունիքի ցավալի դեպքից հետո հրահանգեցինք, գլխավոր մասնագետին կիսամյակի ընթացքում զրույցներ, թրեյնինգներ եւ ատեստավորում ունենալ երկրում գործող մանկաբարձ-գինեկոլոգների հետ: 900-ից ավելի մասնագետներ անցնելու են թեսթավորում, հարցազրույցներ գլխավոր մասնագետի հետ, որից հետո գլխավոր մասնագետն իր երաշխիքը կտա իրենց աշխատանքի համար: Ցավոք, այս նախարարությունը չունի լծակներ՝ կանխելու նրանց գործունեությունը, այն մասնագետների, որոնք չանցնեն այդ թեսթավորումը, բայց համապատասխան փոփոխությունների փաթեթ եւս նախարարությունում մշակվում են, որպեսզի նախարարությունը հնարավորություն ունենա ոչ պատշաճ բժշկական ծառայություն մատուցող բժիշկների լիցենզիան կասեցնի»:
Մանրամասն՝ տեսանյութում
Կարդացեք նաև
Նելլի ԲԱԲԱՅԱՆ
