«Նվիրում» բարեգործական հիմնադրամի հոգաբարձուների խորհրդի և ՀՀ պաշտպանության նախարարին կից հասարակական խորհրդի անդամներն Ամանորին ընդառաջ այցելում են 2014-2016 թթ. մարտական գործողությունների և մարտական հերթապահության ժամանակ վիրավորված՝ առաջին խմբի հաշմանդամ զինծառայողներին և նրանց ընտանիքներին:
«Նվիրում» բարեգործական հիմնադրամը ստեղծվել է ապրիլյան պատերազմից անմիջապես հետո, նպատակը՝ մարտական գործողությունների, մարտական հերթապահության ժամանակ և մարտական առաջադրանք կատարելիս զոհված զինծառայողների և կամավորականների ընտանիքներին, ինչպես նաև վիրավորված և վիրավորվելու հետևանքով հաշմանդամ դարձած զինծառայողներին աջակցելն ու սատարելն է:
Հիմնադրամի հոգաբարձուների խորհրդի անդամները որոշել են հանգանակված շուրջ 4 ու կես միլիոն դրամը բաշխել առաջին խմբի հաշմանդամ 17 զինծառայողի:
«Նվիրում» բարեգործական հիմնադրամի հոգաբարձուների խորհրդի նախագահ, պաշտպանության նախարարի խորհրդական Գեղամ Հարությունյանը կարևորելով հիմնադրամի անհրաժեշտությունը ընդգծեց, որ «գաղափարի շուրջ համախմբվել են հասարակական խորհրդի անդամներ, մտավորականներ, հասարակական գործիչներ. նպատակը՝ մեր զինվորի կողքին, նրա ընտանիքի կողքին կանգնելն է, նյութական և բարոյական աջակցություն ցուցաբերելը, կարծում եմ, դա բոլորիս պարտքն է»:
Հիմնադրամի կարգախոսն է ՝ «Նվիրում՝ նվիրյալներին…»:
Կարդացեք նաև
«Նվիրում» բարեգործական հիմնադրամի հաղորդագրություն
