Օրերս ԱԺ-ում ՀԱԿ խմբակցության քարտուղար Արամ Մանուկյանը կանխատեսում արեց , որ գները բարձրանում են, արտագաղթում է ավելի շատ արտադրող մասը եւ մնում է այն մասը, որը աշխատանքի եւ սոցիալական հարցերի նախարարության դաշտում է: Նա ասաց, որ «եթե այսպես շարունակվի, դրսում Հրանուշ Հակոբյանը դառնալու է համայն սփյուռքի նախագահ, իսկ դուք կդառնաք թոշակառուների նախարար, ուրիշ բան այլեւս չի մնա»:
Այսօր սփյուռքի նախարարի տարեկան ամփոփիչ ասուլիսում Aravot.am-ը Հրանուշ Հակոբյանից հետաքրքրվեց՝ Դուք նման ապագա տեսնո՞ւմ եք, որ վերջում մնալու եք միայն Դուք եւ Արտեմ Ասատրյանը: Նա պատասխանեց. «Ի վերջո ընդդիմությունը նրա համար է, որ քննադատի, որ հակառակը խոսի, իշխանությունն էլ նրա համար է, որ աշխատի: Ինքը փորձել է պատկերավոր արտահայտություններ անել, բայց, կարծում եմ, շատ հոռետեսական է ասել: Այդպես չի կարող լինել: Իհարկե, սփյուռքը միշտ կմնա, այնպես չէ, որ սփյուռքը մի օր կավարտվի, բայց ես այն կարծիքին եմ, որ Հայաստանում գնալով ավելանում է վերադարձողների թիվը»:
Նախարարը պատմեց, որ վերջերս Ֆրանսիայից եկած մի տատիկի է ընդունել. «Ամեն օր իր թոշակը, իր հողը մշակում է, ամբողջ արդյունքը դարձնում է հագուստ եւ մեր միջոցով ուղարկում է զինվորներին: Անկրկնելի մի տատիկ է, որն ապրում է Ջրաշեն գյուղում: Եկել է Արմավիրի մարզ՝ Ֆրանսիայից: Մենք վերջերս ընդունեցինք Կանադայից վերադարձած մի ընտանիք՝ Շանթ անունով մի երիտասարդ իրականում շանթ էր՝ ակտիվ, հզոր, ասաց՝ եկել եմ իմ հայրենիք ու այլեւս չեմ հետ գնա»:
Հրանուշ Հակոբյանը պատմեց, թե ինչ են ասում սփյուռքից ՀՀ եկածները. «Ասում են՝ տիկին Հակոբյան, 50 տարի հայրենիք երգեցինք, հազիվ ձեռքներս է ընկել»:
Կարդացեք նաև
Հրանուշ Հակոբյանն ասաց, որ Անգլիայում ապրող մանկագիր Նունե Սարգսյանը Ղարաբաղի բարբառով հեքիաթներ է գրել եւ 2017-ին հազարավոր գրքեր են նվիրելու նախարարությանը, որ տարածեն ամբողջ սփյուռքում: Դա լինելու է 2017-ի լավագույն ծրագրերից մեկը՝ բարեգործական ակցիան:
Նախարարը նաեւ ասաց, որ պատրաստվում է զեկույց հրատարակել, «Հայերի վիճակն աշխարհում», որը հանրագիտարանային նյութ է. «Կարճ պատմություն կա, վիճակագրություն պրոբլեմների հավաքագրում եւ լուծումներ»:
Հռիփսիմե ՋԵԲԵՋՅԱՆ
