Զվարճանքի օբյեկտներում, մեծահարուստների առանձնատներում այսօր պահվող կենդանիների մասին բնապահպանության նախարարությունը շատ է մտահոգվում: Այսօր այս մասին իր տարեվերջյան ամփոփիչ ասուլիսում ասաց բնապահպանության նախարար Արծվիկ Մինասյանը` պատասխանելով հարցին, թե նախարարությունն ի՞նչ քայլեր է ձեռնարկում այդ ուղղությամբ: Պարոն Մինասյանն ասաց, որ կառավարություն են ներկայացրել որոշման նախագիծ, որով կթույլատրվի այդ կենդանիների նկատմամբ ընթացիկ վերահսկողություն սահմանել եւ նրանց տեղափոխել համապատասխան վայրեր: Բացի այդ, այն անձանց նկատմամբ, որոնք ուզում են ստանձնել վայրի կենդանու, այսպես ասած, խնամակալությունը, պահանջներ են առաջադրվելու` պահպանել պահանջվող չափորոշիչները: Նախարարությունն էլ պետք է կարողանա մոնիտորինգի ենթարկել` տեսնելու, թե իսկապես այդ անձինք պահպանում են ստանձնած պարտավորությունները:
Մանրամասները` տեսանյութում
Արծվիկ Մինասյանն ասաց, որ կենդանիների ներկրման, արտահանման մասով մեր երկիրը Եվրամիության, ԵՏՄ-ի օրենսդրությունների համեմատությամբ ավելի մեղմ ռեժիմ ունի, եւ այդ ռեժիմը պետք է փոխվի ու համապատասխանեցվի միջազգային կանոններին: Ըստ բնապահպանության նախարարի, կենդանիների նույնականացում մեզ մոտ հնարավոր չի կատարել` այդ կանոնակարգերի բացակայության պատճառով:
Կարդացեք նաև
«Ցանկացած վայրի կենդանի, որը բերվում է Հայաստան, պետք է ունենա ծագման համապատասխան փաստաթուղթ, սակայն մենք չունենք այս կենդանու նույնականացման կանոններ: Օրինակ` մեկը բերել է թուղթ, որտեղ գրված է` Շիմպանզե կապիկ այս ինչ տարիքի, բայց արդյոք բերված կամ արտահանված կապիկը նո՞ւյնն է, թե չէ: Այստեղ նույնականացման խնդիր մենք ունենք»:
Հարցին, թե նախկին նախարարի օրոք նախկին վարչապետ Հովիկ Աբրահամյանի եղբորը պատկանող հորատանցքերում ջրային ծավալները խախտվում էին, նորմայից շատ էին ջուր բաց թողնում, ուսումնասիրություն կատարե՞լ եք այդ հորատանցքերում եւ ինչ վիճակում են դրանք ներկայումս գտնվում, արդյոք խախտում կա, չկա, Արծվիկ Մինասյանը պատասխանեց, որ հորատանցքերի մասով վարչապետի հանձնարարականը կա եւ նախարարությունը լայնամասշտաբ իրականացնում է այդ աշխատանքները.
«Անկախ այն բանից, թե դրանք ում են պատկանում եւ դրանց հետեւում ով է կանգնած, մեզ համար սկզբունքային երկու հարց կա. մեկը` արդյոք հորատանցքը, որը շահագործվում է, օրինական է թե` ոչ եւ արդյոք այն բավարարում է արդյունավետության այն չափանիշներին, որոնք դրված են կառավարման պլանում»:
Նախարարի խոսքի շարունակությունը` տեսանյութում
Անդրադառնալով Ամուլսարի շահագործման շուրջ առաջացած մտահոգություններին, պարոն Մինասյանը կարծիք հայտնեց, որ նախագիծը չի խոչընդոտի ոչ տուրիզմին, ոչ էլ Ջերմուկի շրջակայքում ստեղծվող ազգային պարկի գոյությանը:
Ըստ նրա, նախարարությունը նպատակ ունի բնապահպանական ապահովագրություն ներդնել:
Լուսինե ԲՈՒԴԱՂՅԱՆ
3 րոպե տևողությամբ տեսանյութն 3 մասի էք բաժանել ինչի համար?որ մարդկանց մի 3 րոպե տեսանյութի համար 3 անգամ գովազդ ցույց տաք?ամոթ է արդեն լուրեր կարդալն էլ է տհաճ դարնում էդքան գովազդներից
Եթե նկատել եք՝ ամեն այդ տեսանյութը տարբեր բովանդակություն ունի: Ինչ վերաբերում է գովազդներին՝ դրանք հաստատ հաճելի չեն, բայց լրատվամիջոցի համար վաստակելու հնարավորություն են: