«2016 թվականի կարեւոր իրադարձություններն էին ապրիլի կռիվները եւ շարունակություն հանդիսացող Ղարաբաղի հիմնախնդրի կարգավորման գործընթացը»,- դեկտեմբերի 26-ին «Փաստարկ» մամուլի ակումբում ամփոփելով տարին, ասաց ՀՅԴ Հայ դատի եւ քաղաքական հարցերի գրասենյակի ղեկավար Կիրո Մանոյանը:
Նա նշեց, որ ապրիլյան պատերազմը փաստեց, որ բանակցությունների գործընթացը շատ առաջ գնալու տեղ չունի, որովհետեւ Ադրբեջանը դժգոհ է այն առաջարկներից, որոնք ներկայացվում են. «Հայկական կողմը պահանջում է, որ իսկապես փոխադարձ վստահության քայլեր ձեռնարկվեն, իսկ Ադրբեջանը անընդհատ ձգձգում է»:
Կիրո Մանոյանը ընդգծեց, որ որպես սկզբունք պետք է ընդունել, որ ցանկացած պահի կարող է պատերազմը սկսել, եւ ցանկացած պահի պետք է պատրաստ լինել պատերազմին. «Ե՛վ ներսում պետք է ունենանք այն ուժը, միասնականությունը, որ կարողանանք դիմադրել, ե՛ւ բնականաբար անհրաժեշտ քայլերը ձեռնարկել սահմանի երկայնքով: Պետք չէ բացառել, որ կարող է տեղի ունենալ պատերազմ, բայց ապակայունության հավանականությունը մեծ չէ, որովհետեւ Ադրբեջանը ապրիլին տեսավ, թե իր նման գործողությունները ինչ պատասխանի կարժանանան: Եվ երբեք չմոռանանք, որ ի վերջո Ադրբեջանը վազեց Մոսկվա, որպեսզի զինադադար վերահաստատվի»:
Ամի ՉԻՉԱԿՅԱՆ
