Դեկտեմբերի 26-ը Ռուսաստանում հայտարարվել է համազգային սգո օր: Նման որոշում է ընդունվել Ռուսաստանի նախագահ Վլադիմիր Պուտինի կողմից՝ կապված Սև ծովում ռուսական Տու-154 օդանավի կործանման հետ, գրում է Lenta.ru-ն:
Պուտինը կարգադրել է իջեցնել պետական դրոշները երկրի ամբողջ տարածքում, մշակութային հաստատություններին և հեռուստա-ռադիոընկերություններին՝ հետաձգել ժամանցային միջոցառումները և հաղորդումները, անհրաժեշտ քայլեր ձեռնարկել զոհվածների ընտանիքներին օգնություն ցուցաբերելու ուղղությամբ:
Հիշեցնենք, երեկ Սև ծովում կործանվել է Սոչիից Սիրիայի Լաթաքիա քաղաք չվերթ իրականացնող Տու-154 օդանավը, ինչի հետևանքով զոհվել է 92 մարդ՝ 84 ուղևոր և անձնակազմի 8 անդամ: Օդանավում են եղել Ալեքսանդրովի անվան անսամբլի դերասանները, լրագրողներ և զինծառայողներ:
Ռուսաստանի տրանսպորտի նախարար Մաքսիմ Սոկոլովը, որը գլխավորում է ավիավթարի քննության կառավարական հանձնաժողովը, հայտարարել է, որ օդանավի կործանման պատճառ կարող էր լինել տեխնիկական անսարքությունը կամ օդաչուական սխալը:
Կարդացեք նաև
Նրա խոսքով՝ ահաբեկչական գործողության տարբերակը չի ուսումնասիրվում որպես հիմնական վարկած: «Բայց ընդգծեմ, որ դա կպարզի քննությունը, ինչպես նաև Պաշտպանության նախարարության հատուկ տեխնիկական հանձնաժողովը»,- ասել է պաշտոնյան:
Սոկոլովն ընդգծել է, որ որոնողա-փրկարարական աշխատանքները կշարունակվեն այնքան, որքան անհրաժեշտ է:
Պատրաստեց՝ Վիկտորյա ԱՆԴՐԵԱՍՅԱՆԸ
