53 տարեկանում վախճանվել է բրիտանացի երգիչ Ջորջ Մայքլը. նրա մահվան պատճառ կարող էր դառնալ սրտային անբավարարություն, հաղորդում է Billboard-ը:
Ոստիկանությունը հայտնել է, որ մահվան մեջ «կասկածելի հանգամանքներ չկան»:
Երաժշտի մահվան կապակցությամբ իրենց ցավակցություններն են հայտնել նրա գործընկերներ Էլթոն Ջոնը, Մարկ Ռոնսոնը, Լիամ Գալլախերը, Ռայան Ադամսը, ինչպես նաև Լոնդոնի քաղաքապետ Սադիկ Խանը, Բրիտանիայի ընդդիմության առաջնորդ Ջերեմի Կորբինը:
Երգչի մենեջեր Մայքլ Լիփմանը Billboard-ին պատմել է, որ Ջորջ Մայքլի մահվան մասին իմացել է կիրակի առավոտյան: Իրեն հայտնել են, որ երգչին գտել են «անկողնում խաղաղ պառկած»:
Լիփմանի խոսքով՝ երգչի բռնի մահվան տարբերակը բացառվում է: Միաժամանակ նա հավելել է, որ սրտային անբավարարության վարկածը իր համար անսպասելի էր:
Ջորջ Մայքլի երաժշտական կարիերային ընթացքում վաճառվել է նրա շուրջ 100 մլն ձայնագրության: Նրա ամենահայտնի ստեղծագործություններից են Last Christmas, Wake me up before you go-go երգերը, ինչպես նաև Էլթոն Ջոնի հետ Dont let the sun go down on me ստեղծագործությունը:
Պատրաստեց՝ Վիկտորյա ԱՆԴՐԵԱՍՅԱՆԸ
