«Լեւոն Հայրապետյանի հարազատներն ահազանգում էին, որ նա վերջերս վիրահատություն է տարել եւ շաքարախտ ունի: Հարազատները շատ մտահոգված էին, որ նա կարող էր մահանալ»,-ԵՊՀ-ում այսօր կազմակերպված հանդիպման ժամանակ անդրադառնալով ՌԴ-ում անազատության մեջ գտնվող գործարար Լեւոն Հայրապետյանին՝ ասաց ՀՀ ՄԻՊ Արման Թաթոյանի հրավերով ՀՀ եկած ՌԴ մարդու իրավունքների հանձնակատար (պաշտպան) Տատյանա Մոսկալկովան:
«Մենք չենք իրականացնում ապացույցների գնահատում: Մարդը հանցագործ է, թե մեղադրյալ, նրան պետք է վերաբերվել որպես մարդու, որն ունի կարեւոր արժեքներ՝ արժանապատվություն, կյանքի իրավունք»,-նկատեց նա:
Տատյանա Մոսկալկովան հիշեցրեց, որ այս տարի ՀՀ մարդու իրավունքների պաշտպան Արման Թաթոյանը Լեւոն Հայրապետյանի խնդրով դիմել է իրեն. «Ես իրավունք ունեմ այցելելու համապատասխան հաստատություններ: Իմ լիազորված անձին հանձնարարել եմ տեսակցել նրան եւ համոզվել, որ նա իսկապես օգնության կարիք ունի: Արդյունքում նրան տեղափոխեցին բժշկական հաստատություն: Կարծում եմ՝ մարդու կյանք է փրկվել»:
Տատյանա Մոսկալկովան նաեւ հիշեցրեց, որ Հայրապետյանին դատավարությունից հետո տեղափոխել են Մորդովիայի բանտ, որտեղ եւս խնդիրներ են առաջացել. «Մենք կրկին միջամտեցինք, որպեսզի պահպանենք մարդու կյանքը»:
Կարդացեք նաև
Հավելենք, որ ըստ մամուլի տեղեկությունների՝ Հայրապետյանն այս տարեվերջ պետք է ազատ արձակվեր:
Լուիզա ՍՈՒՔԻԱՍՅԱՆ
