Հայաստանի մարդու իրավունքների պաշտպանը եւ Ռուսաստանի մարդու իրավունքների հանձնակատարն այսօր Երեւանում մարդու իրավունքների պաշտպանի գրասենյակում ստորագրեցին համագործակցության հուշագիր:
ՌԴ մարդու իրավունքների հանձնակատար Տատյանա Մոսկալկովայի խոսքով, երկու երկրների ՄԻՊ կառույցների միջեւ առաջին անգամ է ստորագրվում նմանատիպ հուշագիր, ինչը նոր հեռանկարներ է բացում մարդկանց օգնելու հարցում. «Իսկ դա մեր գլխավոր նպատակն է»:
Տիկին Մոսկալկովան ասաց, որ համաձայնագիրը հնարավորություն է նաեւ տալու երկու երկրների ինստիտուտներին օպերատիվ փոխանակել տեղեկատվություն եւ օպերատիվ օգնել մարդկանց, որոնք հայտնվել են դժվարին իրավիճակում:
Նրա խոսքով՝ Ռուսաստանում ապրող ՀՀ քաղաքացիները նույնպես կարող են իրավունքների խախտումների դեպքում դիմել իրեն:
Կարդացեք նաև
Ինչ վերաբերում է ՀՀ քաղաքացիների աշխատանքային իրավունքներին, ՌԴ ՄԻՊ-ն ասաց, որ Հայաստանի` Եվրազեսին միանալը հեշտացրել է ՌԴ-ում հայերի աշխատելու հնարավորությունը. «Այսինքն, հիմա պետք չէ ստանալ հատուկ թույլտվություն Ռուսաստանում աշխատելու համար, արդյունքում մենք ավելի քիչ թվով բողոքներ ենք ստանում»:
ՀՀ ՄԻՊ Արման Թաթոյանն էլ նկատեց, որ իրենց ուղղված բողոքների թվի աճի միտում կա, ինչը պայմանավորեց քաղաքացիներին մտահոգող խնդիրների շատ լինելու եւ ՀՀ ՄԻՊ-ի գործունեության ոլորտների մասին քաղաքացիների իրազեկվածության մակարդակի աճով: Նրա տվյալներով, այս տարվա 10 ամիսների ընթացքում մոտ 40 դիմում-բողոք են ստացել կապված ՌԴ տարբեր մարմինների հետ. «Իհարկե, ՀՀ ՄԻՊ-ը որեւէ իրավասություն չունի ՌԴ իրավասու մարմինների նկատմամբ, այդ իսկ պատճառով կապի մեջ էինք մեր ռուս գործընկերների հետ, իսկ հիմա, կունենանք մեր հատուկ ներկայացուցիչները՝ ՌԴ-ից բողոքներով զբաղվող: Իսկ ՌԴ-ի մարմինների հետ կապված բողոքները տարբեր են, զգալի մասը վերաբերում է միգրացիայի հետ կապված խնդիրներին, բողոքում են, որ արգելվել է ՌԴ-ում աշխատանքը կամ անհիմն վտարվել են ՌԴ-ից, զգալի թիվ են կազմում փակ հաստատությունների հետ կապված բողոքները»:
Պարոն Թաթոյանը հստակեցրեց, որ ներկայացուցիչները գործելու են իրենց երկրներում, բայց ունենալու են, այսպես ասած, հատուկ պաշտոն` հատուկ պատասխանատու ՌԴ բողոքներով, որոնք հնարավորություն կունենան ազատ շփվել ՌԴ ՄԻՊ հանձնակատարի հետ:
Այսօր նախատեսված է նաեւ տիկին Մոսկալկովայի մասնակցությունը ԵՊՀ իրավաբանական ֆակուլտետի գիտական խորհրդի արտահերթ նիստին:
Արփինե ՍԻՄՈՆՅԱՆ
