Ինչպես արդեն տեղեկացրել ենք, ոստիկանության աշխատակիցների նկատմամբ բռնություն գործադրելու գործով ամբաստանյալ Տիգրան Մարգարյանը ընդունեց մեղադրանքը եւ միջնորդեց դատաքննությունն անցկացնել արագացված կարգով:
Դատական նիստից հետո լրագրողների հետ զրույցում նրա պաշտպան Տիգրան Նիկողոսյանն ասաց, որ գործում առկա է եզրակացություն, որ Տիգրան Մարգարյանը տառապում է ծանր հիվանդությամբ, եւ հետեւաբար՝ դատարանի կողմից նշանակված պատիժ չի կարող կրել, եթե այն կապված է ազատազրկման հետ: Հարցին, թե ինչը ստիպեց արագացված դատաքննության մասին միջնորդություն ներկայացնել դատարան, Վարդան Նիկողոսյանը պատասխանեց. «Դա Տիգրան Մարգարյանի համապատասխան դիրքորոշումն է, նա ինքն անձամբ հայտարարություն է կատարել, որ ցանկանում է արագացված դատաքննության կարգ կիրառել»:
Տիգրան Մարգարյանը մանրամասնեց. «Նման միջնորդություն եմ կատարել, որ երկար չչարչարվեմ: Առողջական խնդիրների պատճառով»:
Վարդան Նիկողոսյանը հավելեց, որ ամիսներ շարունակ դատական նիստերին ներկայանալը վնասակար կլինի իր պաշտպանյալի առողջությանը: Տիգրան Մարգարյանի մոտ առկա են ոչ շաքարային դիաբետ եւ օլիգրոֆենիա հիվանդությունները:
Կարդացեք նաև
Հիշեցնենք՝ Տիգրան Մարգարյանին մեղադրանք է առաջադրվել այն բանի համար, որ նա 2016թ. հուլիսի 20-ին Երեւան քաղաքում տեղի ունեցած, հասարակական անվտանգությունը վտանգած բռնությամբ, ջարդելով, գույք ոչնչացնելով եւ վնասելով արտահայտված զանգվածային անկարգությունների ընթացքում բռնություն է գործադրել ոստիկանության աշխատակիցների նկատմամբ:
Ամի ՉԻՉԱԿՅԱՆ
