Կենտրոն եւ Նորք -Մարաշ վարչական շրջանների ընդհանուր իրավասության առաջին ատյանի դատարանում դեկտեմբերի 20-ին, դատավոր Մեսրոպ Մակյանի նախագահությամբ, շարունակվում էր Տիգրան Մարգարյանի գործի քննությունը:
Դատական նիստի ընթացքում Տիգրան Մարգարյանը հայտարարեց, որ ութամյա կրթություն ունի, չի աշխատում եւ ոչ շաքարային դիաբետ ունի: Վերջինս միջնորդեց արագացված քննության կարգ կիրառել: Մեղադրող Հայկ Պետրոսյանը չառարկեց դատաքննությունը արագացված կարգով անցկացնելուն:
Նա ներկայացրեց մեղադրական եզրակացությունը, ըստ որի՝ Տիգրան Մարգարյանին մեղադրանք է առաջադրվել այն բանի համար, որ նա 2016թ. հուլիսի 20-ին Երեւան քաղաքում տեղի ունեցած, հասարակական անվտանգությունը վտանգած բռնությամբ, ջարդելով, գույք ոչնչացնելով եւ վնասելով արտահայտված զանգվածային անկարգությունների ընթացքում բռնություն է գործադրել ոստիկանության աշխատակիցների նկատմամբ:
Տիգրան Մարգարյանը ասաց, որ ընդունում է մեղադրանքը: Դատարանը բավարարեց ամբաստանյալի միջնորդությունը:
Կարդացեք նաև
Հայկ Պետրոսյանը երեք օր ժամանակ խնդրեց մեղադրական ճառին պատրաստվելու համար: Դատական նիստը հետաձգվեց, հաջորդ նիստը կկայանա դեկտեմբերի 24-ին:
Ամի ՉԻՉԱԿՅԱՆ
