Անկարայում Ռուսաստանի դեսպան Անդրեյ Կարլովին սպանողը եղել է ոստիկան, սակայն այդ պահին աշխատանքային պարտականությունները կատարելիս չի եղել, գրում է «ՌԻԱ Նովոստին»:
Ավելի վաղ հայտնել էինք, որ Անկարայում ֆոտոցուցահանդեսի բացմանը անհայտ անձը կրակ է բացել Ռուսաստանի դեսպան Անդրեյ Կարլովի վրա, որը ստացած վիրավորումից մահացել է:
Հրապարակված տեսանյութում լսվում են մարդասպանի խոսքերը՝ արաբերենով. «Մի՛ մոռացեք Հալեպը, մի՛ մոռացեք Սիրիան: Դուք անվտանգության համը չեք զգա, քանի դեռ մեր դաշտերն անվտանգության մեջ չեն: Միայն մահն ինձ այստեղից դուրս կբերի: Յուրաքանչյուրը, ով մասնակցում է այս բռնապետությանը, կվճարի դրա համար»:
Կարդացեք նաև
https://www.youtube.com/watch?v=amx4-KRDdX4
Անկարայի քաղաքապետը նույնպես հաստատել է, որ մարդասպանը ոստիկան է եղել և ենթադրել, որ նա կարող էր լինել Ֆեթուլլահ Գյուլենի կողմնակից:
Ռուսաստանի ԱԳՆ պաշտոնական ներկայացուցիչ Մարի Զախարովան հայտարարել է, որ դեսպանի սպանությունը կքննարկվի ՄԱԿ-ի Անվտանգության խորհրդում:
Հիշեցնենք, անցյալ շաբաթ սիրիական կառավարական ուժերը Ռուսաստանի աջակցությամբ ազատագրեցին Հալեպը, իսկ այնտեղ գտնվող խմբավորումները բացված միջանցքով տեղափոխվում են Իդլիբ:
Պատրաստեց՝ Վիկտորյա ԱՆԴՐԵԱՍՅԱՆԸ
