«Այն ՀՀ-ի համար շատ լուրջ ձեռքբերում եւ առաջընթաց կլինի»,-ասում է պատգամավորը
«Հայ-իրանական հարաբերությունները զարգացնելու լուրջ հեռանկարներ կան»,-Aravot.am-ի հետ զրույցում ասաց ԱԺ ՀՀԿ խմբակցության պատգամավոր Շիրակ Թորոսյանը: Նա հատկապես կարեւորեց Իրան-Հայաստան տրանսպորտային հաղորդակցությունը եւ մասնավորապես՝ երկաթուղու կառուցման անհրաժեշտությունը:
Հետաքրքրվեցինք՝ ծրագրի իրագործման հեռանկարներ կա՞ն: «Գաղափարը քանի գնում՝ հասունանում է, բայց դա մեծ ծախսեր պահանջող ծրագիր է: Ամեն ինչ պետք է արվի՝ այն կյանքի կոչելու համար, քանի որ այն ՀՀ-ի համար շատ լուրջ ձեռքբերում եւ առաջընթաց կլինի՝ կձերբազատվենք վրացական տրանսպորտային մենաշնորհից: Կարծում եմ՝ տարածաշրջանի երկրները եւս շահագրգռված են այդ հարցում, քանի որ դա կլինի նոր մետաքսի ճանապարհ՝ Արեւմուտքն Արեւելքի հետ կապող նոր երկաթուղային ուղի»,-նշեց պատգամավորը:
«Տեսնո՞ւմ եք հնարավորություններ, որ հայկական կողմը կսկսի երկաթուղու իր հատվածի շինարարությունը», հարցին ի պատասխան Շիրակ Թորոսյանն ակնարկեց. «Մենք դա պետք է անենք: Ժամանակին շատերը չէին հավատում, որ հայ-իրանական գազատարը կյանքի կկոչվի, բայց Հայաստանն ունեցավ գազի այդ աղբյուրը»:
Հիշեցնենք, որ Հասան Ռոհանին ՀՀ կայցելի այս չորեքշաբթի:
Ըստ մամուլի՝ ՀՀ կառավարությունը ներդրումներ է փնտրում՝ Հայաստան-Իրան երկաթուղու կառուցման համար:
Կարդացեք նաև
Իսկ նախագիծը որպես ներդրումային ծրագիր՝ տեղադրվել է ՀՀ տնտեսական զարգացման եւ ներդրումների նախարարության կայքում:
Այլ մանրամասները՝ տեսանյութում
Լուիզա ՍՈՒՔԻԱՍՅԱՆ
