Հայ Ազգային Կոնգրեսը շաբաթ՝ դեկտեմբերի 17-ին համագումար էր անցկացրել: Համագումարի ընթացքում ելույթ էր ունեցել նաեւ Հայաստանի Հանրապետության առաջին նախագահ Լեւոն Տեր-Պետրոսյանը:
Aravot.am-ը Ազգային ժողովի պատգամավոր Մարտուն Գրիգորյանին խնդրեց անդրադառնալ առաջին նախագահի ելույթին, պատգամավորը պատասխանեց, որ ընդհանրապես սովորություն չունի եւ ճիշտ չի համարում հանրապետության նախագահների ելույթները մեկնաբանել:
Խնդրեցինք անդրադառնալ ելույթի կոնկրետ հատվածներին, մասնավորապես՝ այն հայտարարությանը, թե Լեռնային Ղարաբաղի հակամարտության կարգավորման այլ տարբերակ, քան փոխզիջումը, գոյություն չունի. «Ես կարծում եմ՝ Լեւոն Տեր-Պետրոսյանը՝ մեր հանրապետության առաջին նախագահը շատ փորձառու քաղաքական գործիչ է: Եվ այն մտքերը, որ արտահայտում է, ինքը կարող է դրանց պատասխանները տալ, կարող եք իրենից ճշտել այդ հարցերի պատասխանները»:
Հետաքրքրվեցինք, որ համաձա՞յն է այն մտքի հետ, թե կարգավորման լուծման բանալին Ռուսաստանի ձեռքերում է, նա պատասխանեց. «Այս պահի դրությամբ այնպիսի հարց եք տալիս, որ տարբեր տեսանկյուններից կարելի է վերլուծել եւ գնահատականներ տալ: Բայց ամեն դեպքում՝ չեմ ուզում այդ թեմաներին անդրադառնալ»:
Կարդացեք նաև
Ամի ՉԻՉԱԿՅԱՆ
