«Մեր հարեւան Իրանն ունի բավականին մեծ շուկա, բայց բավականին պաշտպանված շուկայական մոտեցումներ: Կարգավորումների տեսանկյունից ՀՀ-ն բավականին լիբերալ է, իսկ Իրանում մաքսատուրքերը բավականին բարձր են»,-Aravot.am-ի հետ զրույցում անդրադառնալով հարցին, թե Իրանի նախագահ Հասան Ռոհանիի՝ առաջիկայում ՀՀ նախատեսվելիք այցի ընթացքում ի՞նչ հարցեր ու խնդիրներ կարող են քննարկվել, ասաց ՀՀ տնտեսական զարգացման եւ ներդրումների նախարարի առաջին տեղակալ Գարեգին Մելքոնյանը:
«Թե ինչ հարցեր կարող են քննարկվել, կարծում եմ՝ մեր շարունակական աշխատանքը պետք է ուղղված լինի դեպի իրանական շուկա մեր տեղական արտադրանքի արտահանման ծավալների ավելացմանը: Ինչ վերաբերում է մաքսատուրքերի չափին, քննարկումները պետք է ծավալվեն ԵՏՄ կանոնակարգերի համաձայն: Եթե արտոնյալ դրույքաչափերը միակողմանի են եւ Իրանի կողմից ՀՀ-ին չեն տրվում, պետք է լինեն ԵՏՄ-Իրան ձեւաչափով, որում ՀՀ-ն ակտիվ դերակատար է»,-նշեց Գարեգին Մելքոնյանը:
Նա տեղեկացրեց, որ մաքսատուրքերի դրույքաչափերի կարգավորման հարցով ՀՀ-ն մշտապես դիմել է Իրանին, որպեսզի հայ արտադրողներին տրամադրվեն ավելի բարենպաստ պայմաններ, քանի որ վերջիններս Իրանի համար վտանգ չեն ներկայացնում: «Իրանի հետ առեւտրաշրջանառությունն ավելացնելու նախադրյալներ կան»,-վստահեցրեց մեր զրուցակիցը:
Հավելենք, որ Հասան Ռոհանին ՀՀ կայցելի այս չորեքշաբթի:
Կարդացեք նաև
Այլ մանրամասները՝ տեսանյութում:
Լուիզա ՍՈՒՔԻԱՍՅԱՆ
