Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի օրհնությամբ Մայր Աթոռ Սուրբ Էջմիածնի Քրիստոնեական դաստիարակության կենտրոնը ՀՀ Կրթության և գիտության նախարարության հետ համագործակցաբար, ԵՀԽ Կլոր Սեղան հիմնադրամի և ՄԱԿ-ի բնակչության հիմնադրամի աջակցությամբ, 2010 թվականից սկսյալ՝ իրականացնում է «Հոգևոր աջակցություն ընտանիքներին» ծրագիրը, որ նպատակ ունի դպրոցներում քահանաների հետ ծնողական և աշակերտական հանդիպումների միջոցով ուղենշել ընտանիքի առջև ծառացած արդի հիմնախնդիրների հաղթահարման հոգևոր ճանապարհները:
Ծրագրի շրջանակներում դեկտեմբերի 19-ին` ժամը 12:00-ին, Երևանի ՔԴԿ գրասենյակում (Սայաթ-Նովա – Աբովյան խաչմերուկ, Ս. Աննա և Ս. Կաթողիկե եկեղեցիների հարևանությամբ) կազմակերպվելու է կլոր սեղան-քննարկում՝ Ազգային ժողովի, ՀՀ Կրթության և գիտության, ՀՀ Աշխատանքի և սոցիալական հարցերի նախարարությունների, ՀՀ Ոստիկանության, Միացյալ Ազգերի Կազմակերպության Բնակչության և մանկական հիմնադրամների, ԵՀԽ Հայաստանյան Կլոր Սեղան հիմնադրամի, ընտանեկան խնդիրներով զբաղվող հասարակական կառույցների և հիմնադրամների ներկայացուցիչների մասնակցությամբ:
Քննարկմանը ներկայացվելու են զեկուցումներ «Քրիստոսի Եկեղեցին և ընտանեկան ներդաշնակությունը» և «Անդրադարձ ներընտանեկան կյանքում առկա որոշ խնդիրներին ըստ «Կանոնագիրք Հայոց» ժողովածուի» թեմաներով, կազմակերպվելու է քննարկում, ապա ներկայացվելու են ծրագրի ընթացիկ տարվա արդյունքները:
Մայր Աթոռ Սուրբ Էջմիածնի
Քրիստոնեական դաստիարակության կենտրոն
