Երեկվանից «Դեղերի մասին» նոր օրենքն ուժի մեջ է մտել եւ քաղաքացիներին դեղատներում հրաժարվում են մի շարք դեղամիջոցներ` այդ թվում եւ հակաբիոտիկներ, առանց դեղատոմսի վաճառել: Սա քաղաքացիների շրջանում դժգոհության ալիք է բարձրացրել, քանի որ չգիտեն` մյուս դեղերն է՞լ, օրինակ` գլխացավի կամ այլ ցավազրկողներ, պետք է դեղատոմսով ձեռք բերեն:
Այսօր առողջապահության նախարարությունում առողջապահության փոխնախարար Սերգեյ Խաչատրյանը, պատասխանելով Aravot.am-ի հարցին, նշեց, որ այն բոլոր դեղերը, որոնք դեղատոմսով դուրս գրվող չեն, քաղաքացին կարող է ձեռք բերել ազատ, առանց դեղատոմսի, առանց քանակների սահմանափակման` դեղատներից:
Ըստ Սերգեյ Խաչատրյանի, եւ դեղատոմսով ձեռքբերվող եւ առանց դեղատոմսի դեղերի ցանկը կա առողջապահության նախարարության կայքէջում եւ քաղաքացիները կարող են ծանոթանալ:
Մանրամասները` տեսանյութում
Կարդացեք նաև
Քաղաքացիների այն մտահոգություններին, թե նոր օրենքի ուժի մեջ մտնելուց հետո դեղերն այլեւս հատով չի վաճառվելու, առողջապահության փոխնախարարն ասաց, որ որեւէ սահմանափակում չի լինելու եւ դեղը հատիկով վաճառվելու է, սակայն հատավաճառի դեպքում պայմաններն ավելի են խստացվել: Օրինակ` առանձնացված դեղահաբի փաթեթավորման վրա պարտադիր պետք է գրվի դեղի անվանումը, ժամկետը, որը տվյալ դեպքում ավելի պակաս պետք է նշվի, դեղ տվողի անունը եւ այլն:
Պարոն Խաչատրյանն այսօր ամփոփեց անցնող տարին` անդրադառնալով նաեւ մայրական եւ մանկական մահացության ցուցանիշներին, որը նախորդ տարիների համեմատությամբ նվազել է: Այսպես` 2016 թվականին արձանագրված մայրական մահացության 10 դեպքից 7–ի պատճառն, ըստ փոխնախարարի, եղել են հղիության հետ չկապված ախտաբանություններ (լյարդի սուր անբավարարություն եւ լյարդային կոմա, գեներալիզացված տուբերկուլոզային ինտոքսիկացիա, գլխուղեղի անոթների ինքնաբուխ պատռվածք տանը)։ Մյուս 3 դեպքերում մահվան պատճառը հետծննդյան արյունահոսությունն է եւ հեմոռագիկ շոկը:
Արձանագրվել է 0-1 տարեկան երեխաների մահվան դեպքերի նվազում: Ազգային վիճակագրական ծառայության նախնական տվյալների համաձայն` 2016թ. 11 ամսվա ընթացքում 0-1 տարեկան երեխաների մահերի բացարձակ թիվը կազմել է 325` 2015 թ. նույն ժամանակահատվածի 336 դեպքի համեմատությամբ:
Սերգեյ Խաչատրյանի տվյալներով, 0-5 տարեկան երեխաների մահացությունը նույնպես կրճատվել է: Ազգային վիճակագրական ծառայության նախնական տվյալների համաձայն, 2016թ. 11 ամսվա ընթացքում 0-5 տարեկան երեխաների մահերի բացարձակ թիվը կազմել է 376` 2015 թ. նույն ժամանակահատվածի 398 դեպքի համեմատությամբ:
Լուսինե ԲՈՒԴԱՂՅԱՆ
