Այսօր ԱԺ արտահերթ նստաշրջանն ավարտվեց: Մինչ այդ ԱԺ նախագահ Գալուստ Սահակյանը մի քանի անգամ խնդրեց պատգամավորներին չբացակայել նիստերի դահլիճից: Ավելին՝ երեկվանից Էդուարդ Շարմազանովը բացատրում էր, որ նիստը կարճ է տեւելու, բայց քվեարկություններ ունեն, անպայման ներկա լինեն:
Այսօր պատգամավորները ասես «արձակուրդային» տրամադրության մեջ էին, անընդհատ աղմկում էին, զրուցում:
Գալուստ Սահակյանը դիտողություն արեց. «Խնդրում եմ ձայները կտրել եւ լսել»:
Պատգամավորների մի մասը չէր եկել եւ Գալուստ Սահակյանը փորձում էր ժամանակ շահել. «Դուք համբերեք, մինչեւ պատգամավորները կհավաքվեն»:
Կարդացեք նաև
Նիստերի դահլիճում պատգամավորները շարունակում էին աղմկել: Գալուստ Սահակյանը բարկացավ. «Մի րոպե հնարավոր չի՞, դա ո՞վ է որ, այ քեզ բա՜ն»:
Առաքել Մովսիսյանը՝ Շմայսը, փորձեց ճշտել. «Ո՞ւմ մասին ա խոսքը»: Նա ուզում էր հասկանալ՝ դիտողության հասցեատերն ի՞նքն է: Գալուստ Սահակյանն էլ պատասխանեց. «Քո չէ, էն մյուսի»:
«Գնումների մասին» նախագիծը, որով ՀՀ նախագահի, վարչապետի եւ ԱԺ նախագահի արարողակարգային գնումները համարվելու են պետական գաղտնիք, ամբողջությամբ ընդունվեց, ընդ որում, որեւէ պատգամավոր դեմ չքվեարկեց. 78 կողմ, 14 ձեռնպահ:
Հռիփսիմե ՋԵԲԵՋՅԱՆ
