Անի Անտոնյանը՝ իր լուսանկարչական ցուցահանդեսի մասին
Հրազդանի Երկրագիտական թանգարանում վերջերս բացվեց լրագրող Անի Անտոնյանի «Մանկությունը լուսանցքում» լուսանկարչական ցուցահանդեսը: Զրուցեցինք հեղինակի՝ Անի Անտոնյանի հետ:
– Անի՛, լինելով լրագրող, սպասվում էր, որ պետք է գրեիր, ոչ թե ֆոտոշարքի միջոցով ինչ-որ բան ներկայացնեիր. ինչո՞ւ ընտրեցիր այս տարբերակը:
– Ամռանը մասնակցեցի «Ֆոկուս» արվեստի հ/կ-ի ACTV նախագծին, որին մասնակցում էին 10 լրագրողներ՝ տարբեր լրատվամիջոցներից: Նախագծի ընթացքում պետք է ներկայացնեի մի նախագիծ, որը, եթե հաղթեր, իրականացվելու էր կազմակերպիչների անմիջական աջակցությամբ: Հուրախություն ինձ՝ նախագիծս երեք հաղթողներից մեկն էր: Այդպես իրականացավ Ֆոտոցուցահանդեսս:
– Նկարներումդ խարխլված տներ են եւ երեխաներ. ինչո՞ւ հենց նրանք:
– Թիրախումս եղել են «Տնակներ» կոչվող թաղամասը եւ այնտեղ ապրող երեխաները, որովհետեւ միշտ ապրել եմ այդ տնակների կողքին եւ տեսել եմ, որ վերաբերմունքը տարբեր է այնտեղի բնակիչների նկատմամբ: Նույնիսկ փոքր տարիքում մեզ արգելում էին նրանց հետ շփվել, խաղալ՝ պատճառաբանելով, որ նրանք անդաստիարակ են, վարվեցողության տարրական կանոններից զուրկ, անգամ ասում էին, որ գողություններ են անում: Հիմա այդտեղ ապրում է չորս ընտանիք, որոնք փախստականի կարգավիճակ ունեն: Նրանք չունեն նորմալ աշխատանք, տնակները նորմալ վիճակում չեն, երեխաներին տանում են գիշերօթիկ դպրոցներ, որը մի փոքր թեթեւացնում է նրանց վիճակը, երբեմն էլ հենց երեխաներն են աշխատում եւ օգնում ծնողներին: Ասեմ նաեւ, որ ծնողներն էլ հիմնականում ամուսնալուծված են:
Հիմնական նպատակս ցույց տալն է, որ նորմալ երեխաների կողքին կան նաեւ այսպիսի առօրյայով եւ կենցաղով ապրող երեխաներ, ովքեր հիմնականում զբաղվում են անասնապահությամբ, հողագործությամբ: Չեմ ցանկացել, որ լաց ու կոծ լինի, պարզապես նպատակ եմ ունեցել արձանագրել իրականությունն ու տարբերությունը:
– Իսկ ինչո՞ւ ես ցուցահանդեսի խորագիրը դրել «Մանկությունը լուսանցքում»:
– Խորագրի ընտրությունը կատարել եմ ինձ շատ մոտ մարդու օգնությամբ: Եվ լուսանցքում, որովհետեւ որքան էլ որ այդ երեխաները ազատության մեջ են եւ, թվում է, անկախ են, միեւնույն է՝ նրանց հնարավորությունները խիստ սահմանափակ են:
– Առաջիկայում նախատեսո՞ւմ ես նման այլ նախագիծ, թե՞ կսահմանափակվես միայն սրանով:
– Այլ ցուցահանդեսներ դեռ չեմ նախատեսում, բայց կա առաջարկ նույն նկարները ներկայացնել նաեւ Երեւանում:
Զրուցեց ԳԱՅԱՆԵ ԻՍՐԱՅԵԼՅԱՆԸ
Լուսանկարները տրամադրել է
Անի Անտոնյանը
«Առավոտ»
15.12.2016
