«Գլխավոր դատախազն է մեղադրանքը հաստատել, նա էլ դատարանում պետք է պաշտպաներ մեղադրանքը: «Դատախազության մասին» օրենքի 26 հոդվածի 1-ին մասն ասում է՝ Կարեն Բիշարյանին հանձնարարել, լիազորել դատախազի լիազորություններով, իսկ դատական օրենսգրքի 13 հոդվածն ասում է նաեւ մեղադրող, այսինքն՝ գլխավոր դատախազը պետք է գար դատարան, որպես երկրորդ մեղադրող ներգրավեր Կարեն Բիշարյանին կամ ցանկացած այլ մեղադրող»,- կաշառք վերցնելու մեջ մեղադրվող դատավոր Իշխան Բարսեղյանի գործով դատական նիստից հետո դատարանում իր կատարած հայտարարությունը պարզաբանեց Բարսեղյանի պաշտպան փաստաբան Վարդուհի Էլբակյանը:
Նրա խոսքով՝ գլխավոր դատախազն իրավունք չուներ իր լիազորությունները հանձնել այլ դատախազի, ինչպես նա արեց այս գործով. «Սրա համար ենք ասում, որ պատշաճ դատախազ չէ»:
Տիկին Էլբակյանը չբացառեց, որ հաջորդ դատական նիստին գործը քննող դատավոր Կարեն Մարդանյանին ինքնաբացարկ կհայտնեն, հնարավոր է դատախազին էլ՝ բացարկ:
Իշխան Բարսեղյանին դատարանում պաշտպանում է 6 փաստաբան: Տիկին Էլբակյանը դա բացատրեց այսպես. «Գործը, թվում է, երկու հատոր է եւ քիչ է, ծավալուն չէ: Վեց պաշտպանը գուցեեւ շատ թվա, բայց այդ գործի յուրաքանչյուր թերթ վերլուծության եւ մեկնաբանության կարիք ունի ու յուրաքանչյուր պաշտպան իր առաքելությունն ունի այդ գործով»:
Կարդացեք նաև
Արփինե ՍԻՄՈՆՅԱՆ
