Հայաստանի զարգացման հիմնադրամի և «Air Arabia» ավիաընկերության աջակցությամբ, Արաբական Միացյալ Էմիրությունների ֆիլիպինյան համայնքի մի խումբ լրագրողների եռօրյա ճանաչողական այցից հետո Հայաստանի զբոսաշրջային գրավչությունների մասին նյութեր են հրապարակվել: Լրագրողներից մեկը դինամիկ տեսանյութ է պատրաստել՝ ընդամենը 1 րոպե 18 վայրկյանում ընդգրկելով Հայաստանի պայծառ արևը, պատմական կոթողները, բազմազան բնությունը և նույնիսկ գաստրոնոմիական գայթակղություններ առաջացրել:
«The Filipino Times» թերթի և կայքի հոդվածագիրը նախ ներկայացրել է մեր երկրի աշխարհագրական դիրքը, պատմել սահմանակից պետությունների մասին, այնուհետև նշել, որ Հայաստան կարելի է հասնել 2 ժամ 45 րոպեում՝ Շարժա-Երևան ուղիղ չվերթով։
«Արաբական երկրները Հայաստանի համար թիրախային շուկա են, և ակնհայտորեն, այս տարվա ընթացքում մեր իրականացրած մարքեթինգային միջոցառումներն արդյունք են տվել: Օրինակ, ԱՄԷ ֆիլիպինյան համայնքից այցելող զբոսաշրջիկների թիվը մի քանի անգամ բազմապատկվել է, որին մեծապես նպաստել է նաև Հռոմի Սրբազան Քահանայապետի ուխտագնացությունը մեր երկիր:
Այս տարվա 9 ամիսներին 4332 զբոսաշրջիկ է եկել, իսկ ամբողջ անցած տարվա ընթացքում՝ ընդամենը 994»,- նշել է Հայաստանի զարգացման հիմնադրամի գործադիր տնօրեն Կարէն Մկրտիչեանը:
Իսկ նյութի հեղինակը տպավորություններն է ներկայացրել իր հանգրվանած հյուրանոցի, առևտրի կենտրոնի, շուկայի, ռեստորանների մասին՝ գրելով նաև ծառայությունների արժեքը։ «Ու դուք հանկարծ կհայտնաբերեք, որ տեղաբնակները համոզել են ձեզ գնել իրենց բազմազան թարմ և չորացրած մրգերը՝ հմայելով ջերմ հյուրընկալությամբ»,-գրել է հոդվածագիրը՝ շուկայում շրջելուց հետո։ Նոր բացահայտումների առիթ է դարձել Դիլիջան, Հաղարծնի վանք, Սևանա Լիճ և կղզի, Գեղարդի վանական համալիր, Գառնու հեթանոսական տաճար այցելությունը: Թերթը գրել է, որ տեղաբնակները Դիլիջանն անվանում են «Հայկական Շվեյցարիա», ինչը լիովին արդարացված է ամռանը։ «The Filipino Times»-ի անդրադարձը՝ հետևյալ հղմամբ։
Հայաստանի զարգացման հիմնադրամի լրատվական ծառայություն
