Սոցիալական գործընկերության ռուսաստանյան մոդելը անհնար է պատկերացնել առանց ազգային համայնքների: Այս իմաստով համայնքների ինքնակազմակերպման գործընթացը պետության և հասարակության միջև սոցիալական գործընկերության կարևոր հիմքերից մեկն է հանդիսանում: Այս մասին դեկտեմբերի 14–ին Մոսկվայում, Ռուսաստանի 6–րդ Սոցիալական ֆորումում ունեցած ելույթում հայտարարել է քաղաքագետ Յուրի Նավոյանը:
Նա նշել է, որ ՌԴ-ում զգալի քանակությամբ հայկական կազմակերպությունների գործունեությունն ունի սոցիալական ուղղվածություն: Մասնավորապես, այն ընդգրկում է հայրենակիցներին սոցիալական և իրավական աջակցության ցուցաբերումը, հասարակության իրավական մշակույթի բարձրացմանն ուղղված գործունեությունը, երիտասարդական նախագծերի աջակցությունը, կրթական, մշակութային և մարզական ծրագրերի իրականացումը: Հաշվի առնելով այն, որ Ռուսաստանի հայ համայնքը իր անմիջական կապվածությամբ և մասնակցությամբ որոշակիորեն հանդիսանում է Հայաստանի սոցիալ-տնտեսական կայունության երաշխավորը, ապա այս դեպքում պետության և համայնքի սոցիալական գործընկերությունը միջազգային բնույթ է ստանում:
Իբրև Ռուսաստանում սոցիալական գործընկերության հետագա զարգացման տարբերակ, Յուրի Նավոյանը առաջարկել է իշխանական բոլոր մակարդակներում կատարելագործել համայնքային կազմակերպությունների մասնակցությամբ համատեղ ինստիտուտները, ուր կքննարկվեն և լուծում կստանան փոխադարձ հետաքրքրություն ներկայացնող հարցերը:
«Սոցիալական քաղաքականությունը ՌԴ-ում 2030. սոցիալական գործընկերության ռազմավարությունները» խորագրով Ռուսաստանի 6–րդ Սոցիալական ֆորումը կազմակերպել էին Ռազմավարական նախաձեռնությունների գործակալությունը և «Դելովայա Ռոսսիյան»` ՌԴ ԱԳՆ ՅՈՒՆԵՍԿՕ-ի գործերով հանձնաժողովի աջակցությամբ: Ֆորումը բացել է ՌԴ փոխվարչապետ Օլգա Գոլոդեցը, ելույթներով հանդես են եկել նախարարներ, պատգամավորներ, բիզնեսի, կրթական հաստատությունների և հասարակական կազմակերպությունների ներկայացուցիչներ:
Կարդացեք նաև
Մամլո հաղորդագրություն
