Արամ Սարգսյանը՝ ՀԱԿ-ում եղած տհաճ բանավեճերի,
Տեր-Պետրոսյանի խաթեր արած իր քայլերի եւ նոր դաշինքի մասին
Օրեր առաջ «Հանրապետություն», «Լուսավոր Հայաստան» եւ «Քաղաքացիական պայմանագիր» կուսակցությունները հուշագիր ստորագրեցին՝ 2017-ի խորհրդարանական ընտրություններին միասնական դաշինքով մասնակցելու մասին:
«Հանրապետություն» կուսակցության նախագահ Արամ Սարգսյանը հայտարարեց, որ այս դաշինքը տարբերվում է իրենց կազմած մյուս բոլոր դաշինքներից, քանի որ այն գաղափարական հենքի վրա է: «Առավոտի» հետ զրույցում Արամ Սարգսյանը ներկայացրեց, թե ինչ տարբերություններ կան այս նոր դաշինքի եւ, օրինակ, ՀԱԿ-ի հետ կազմած դաշինքի միջեւ: Նրա խոսքով՝ «Այս դաշինքում մենք ամեն ինչ քննարկել ենք, իսկ ՀԱԿ դաշինքում կային ծայրահեղ ռուսական ազդեցության տակ գտնվողներից մինչեւ ծայրահեղ արեւմտյան արժեքներ դավանողներ: Կար այս հակասությունը, Սմբատ Կարախանյանի գործոնը միշտ կար, որը երբեք էլ ինձ համար հաճելի չի եղել, այդ բանավեճերը եղել են: Եղել են նաեւ ներքաղաքական դաշտում մարտավարական առումով հակասություններ, մասնավորապես՝ ԲՀԿ-ի եւ նրա ղեկավարի հետ կապված: Եղել են նաեւ տակտիկական հարցերում գործունեությունը ծավալելու հետ կապված խնդիրներ: Այդ խնդիրների մասին ես գաղտնիք չեմ պահել, հետեւից չեմ խոսել, ես թաքուն չեմ արել՝ ի տարբերություն շատերի: ՀԱԿ-ի համաժողովների ժամանակ մեծ թվով մարդիկ են մասնակցել, ես բարձրաձայնել եմ: Իհարկե, կային հակասություններ, որը բերեց սրան: Իսկ ՀԱԿ-ի քարոզարշավին ես մասնակցեցի ուղղակի Լեւոն Տեր-Պետրոսյանի խաթեր, որ անընդհատ հարցեր չտան, թե ինչու Արամը չկա:
Ակնհայտ էր, որ այդ ենթատեքստում այլեւս մեզ չէինք տեսնում: Բայց քանի որ պարտավոր էինք, Մարտի 1 էինք անցել, ամենաակտիվներից մեկը մասնակցեցի ու մանդատը վայր դրեցի, դուրս եկա: Իրենք այդ ամեն ինչի մասին գիտեին: Այնպես չի, որ ես կարող եմ սուտ ասել, իմաստը ո՞րն է»:
Կարդացեք նաև
Արամ Սարգսյանը վստահեցրեց, որ իրենց նոր դաշինքում նման խնդիրներ չեն լինելու. «Այս դաշինքում աշխարհաքաղաքական մոդելի մասին է խոսքը, այս փաստաթղթում գրված է, որ մենք եվրոպական ժողովրդավարության մոդելի պետություն ենք ձեւավորում, այս հարցը հստակ դրված է: Այսինքն՝ մենք Ղազախստանի կամ Բելառուսի մոդելի չենք: Այնտեղ արգելված էր այդ թեման, այստեղ արգելված չէ, մենք հստակեցրել ենք»:
Մեր դիտարկմանը՝ կյանքը ցույց է տալիս, որ նախընտրական դաշինքները մինչեւ ընտրությունները շատ լավ գործում են, հետո երբ գալիս է մանդատների, աթոռների բաժանման պահը, սկսվում են ջլատումները, Արամ Սարգսյանն արձագանքեց. «Դա կախված է դաշինքի հաջողություններից կամ անհաջողություններից: Կարելի է համարել, որ «Արդարություն» դաշինքը գործող դաշինքներից ամենահաջողվածն էր, որովհետեւ ամենաշատ թվով պատգամավորներն ուներ եւ ԱԺ-ում միակ ընդդիմադիր դաշինքն է եղել, որը երկրորդ տեղ էր զբաղեցրել, բայց «Արդարություն» դաշինքի գործունեությանը ես չմասնակցեցի, որովհետեւ կապ չունի՝ դու 16 ես, 32, թե 38, միեւնույն է՝ քո խոսքը չի անցնում: Միեւնույն է՝ քվեարկությունն արվում է այնպես, ինչպես արվում է, հետեւաբար քո գործունեությունը դառնում է անիմաստ»:
Արամ Սարգսյանն ասաց, որ խորհրդարանական ընտրությունները երկրի առաջին դեմքի ընտրություններ են, իսկ իշխանությունները այն իջեցրել են, հասցրել են տեղական հեղինակությունների մակարդակի. «Մեր դաշինքը 65 մարդու նվազագույնը պիտի առաջադրի, եթե մեծ ընտրատեղամասերում ԿԸՀ-ն չորոշի, որ 5-ի փոխարեն 10 մարդ պիտի գնա: Պատկերացրեք՝ այդքան մարդ պիտի իշխանությունը նաեւ դնի, պիտի Լեւոն Տեր-Պետրոսյանը դնի, այդքան մարդ պիտի Գագիկ Ծառուկյանը դնի, եւ այդ ամեն ինչը, այդ թշնամանքը, որը լինելու է ներքին պայքարի ժամանակ, ներքին պայքարը սոսկալի թշնամանք ունի, դա ամենամեծ ատելությունն է, որ այդ օրենքը գրողն արել է»:
Հարցին՝ Դուք անձամբ ինչպե՞ս եք վերաբերվում Գագիկ Ծառուկյանի վերադարձին, արդյոք դա իշխանությունների հետ համաձայնեցվա՞ծ քայլ է, Արամ Սարգսյանը պատասխանեց. «Միանշանակ: Ես բազմաթիվ անգամ եմ ասել, որ նա սեփական կամքով չի մտել քաղաքական դաշտ Ռոբերտ Քոչարյանի իշխանության ժամանակ: Սեփական կամքով չէր, որ Սերժ Սարգսյանի իշխանության ժամանակ հանեցին քաղաքական դաշտից, ու ինքն ասաց, որ ինքը քաղաքական գործիչ չի, հիմա էլ սեփական կամքով չի, որ մտել է քաղաքական դաշտ: Ակնհայտ է, որ Սերժ Սարգսյանը վախենում է այս ընտրություններից, ակնհայտ է, որ հասկացել է, որ այս ընտրությունները եւ Ընտրական օրենսգրքում արված փոփոխությունները կարող են հակառակ գործընթացներ ապահովել, եւ այս առումով փորձում է իրենց ընտրազանգվածից դուրս ընտրազանգվածին չթողնել ընդդիմադիր դաշտում, այլ այդտեղ որոշակի վերահսկելի մարդկանց կամ կուսակցությունների միջոցով հավաքել»:
Մեր հարցին՝ Գագիկ Ծառուկյանը Քոչարյանի հետ է կապվում, ինչպե՞ս է, որ Սերժ Սարգսյանը Քոչարյանի մարդուն է, այսպես ասած, «խաղացնում»՝ Արամ Սարգսյանը պատասխանեց. «Նույնչափ Սերժ Սարգսյանն էլ է Քոչարյանի հետ կապվում: Այդ մարդիկ նույն ժամանակում են հարստացել՝ սկսած Գագիկ Ծառուկյանից, վերջացրած Սերժ Սարգսյանով: Նայեք այն ժամանակ իրենց հայտարարագրած ունեցվածքը եւ այսօրվա հայտարարագրածը, տեսեք այդ ահռելի տարբերությունը թե՛ իրենց, եւ թե՛ իրենց ընտանիքների ունեցվածքի: Իրենք մի թիմ են: Իրենք շատ լավ հասկանում են, որ մեր իշխանության գալու դեպքում իրենք բոլորով կորած են, եւ այդ պայքարը մեր դեմ է»:
ՀՌԻՓՍԻՄԵ ՋԵԲԵՋՅԱՆ
«Առավոտ»
14.12.2016
