Շիրակի մարզպետարանի ճանապարհաշինության բաժնի պետ Խաչատուր Խնձրցյանի փաստմամբ, թեեւ այս պահին Շիրակի մարզում փակ ճանապարհներ չկան, սակայն վիճակն ահավոր է հատկապես Ամասիայում ու Աշոցքում:
«Տեսնում եք Գյումրիում հիմա ինչ վիճակ է, կրկնակի անգամ վատ է ճանապարհների վիճակը: Իհարկե, որեւէ խնդիր դեռ չի ծագել, որ ասենք՝ մեքենաներ ու մարդիկ մնան ճանապարհներին: Փրկարարները հենց ահազանգում են՝ անմիջապես արձագանքում ենք, հանում ենք մեքենաները, սակայն երթեւեկելը խիստ վտանգավոր է: Տեխնիկան դրսում է, այս ամբողջ ընթացքում աշխատում է: Փորձում ենք այնպես անել, որ երթեւեկության մեջ մեքենաներ չմնան, որտեղ խնդիր կա՝ կարգավորենք: Բայց նորից եմ կրկնում՝ այս պահին խնդիր դեռ չի եղել, որեւէ տեղ մեքենա ու մարդ չի մնացել: Փակ ճանապարհներ չունենք, բայց ունենք դժվարանցանելի. ե՛ւ Աշոցքում, ե՛ւ Ամասիայում տեսանելիություն չկա: Բուքը այնպես է ֆռռացնում, որ տեխնիկան շատ դժվարությամբ է աշխատում: Նույնը վիճակն է Ջաջուռում ու Լանջիկում, բայց եւ այնպես ամենաբարդը Աշոցքի ու Ամասիայի վիճակն է: Կարծում եմ 25 մետր վայրկյան արագությամբ ուժեղ քամին, բուքը վաղը նույն արագությամբ, ինտենսիվությամբ կշարունակվեն», -ասաց մարզպետարանի պաշտոնյան:
Նշենք, որ ահավոր վիճակ է նաեւ Գյումրիում. փողոցներում քայլել հնարավոր չէ, ձյունախառն քամին մարդ է քշում, դուրս եկողը շնչահեղձ է լինում. առավոտյան ժամը 9-ի սահմաններում վիճակը շատ ավելի մեղմ էր, քանի այս պահին:
Կարդացեք նաև
Նունե ԱՐԵՎՇԱՏՅԱՆ
