ԼՂՀ ներկայացուցչական խորհրդի խորհրդական Գառնիկ Իսագուլյանը շարունակում է պնդել, որ ժամանակին ԲՀԿ ղեկավար Գագիկ Ծառուկյանին բոլորը թողեցին մենակ: Այժմ էլ պարոն Իսագուլյանը հայտարարում է, թե չի վախենում ևս մեկ անգամ շեշտել, որ ինքը ժամանակին պաշտպանել է ԲՀԿ ղեկավարին:
«Հայելի» ակումբում նա մտահոգություն հայտնեց. «Երբ կա կարկանդակի բաժանում, բոլորն ուզում են ամենամեծ բաժինը ստանալ, բայց երբ վտանգ կա, որ դա կարող է վերածվել որոշակի իրավիճակի, որը կարող է զոհողություններ պահանջել, այդ զոհողությունը ոչ ոք պատրաստ չէ կիսել»:
Գագիկ Ծառուկյանի վերադարձի վերաբերյալ պարոն Իսագուլյանը նշեց. «Ցանկացած մեկի վերադարձը, գործունեությունը քաղաքական դաշտում ողջունելի է, եթե այդ պայքարը չի վերածվում պայքարի պետականության ու պետության դեմ»:
Իր` քաղաքականություն վերադառնալու մասին պարոն Իսագուլյանն ասաց. «Առայժմ ԼՂՀ պաշտոնյա եմ, ուշադրությամբ հետևում եմ այն գործընթացներին, որոնք ընթանում են Հայաստանում: Որոշում կայացնելու դեպքում դրա մասին կհայտարարեմ»:
Կարդացեք նաև
Պարոն Իսագուլյանը նաև դրական է վերաբերվում ուժերի` դաշինքներ կազմելուն` կրկին ելնելով այն տրամաբանությունից, որ դրանք առողջ գաղափարախոսության վրա հիմնված լինեն և հանուն պետականության:
Դառնալով ԼՂՀ-ում իրավիճակին` Գառնիկ Իսագուլյանը հավաստիացրեց, որ կյանքը Լեռնային Ղարաբաղում եռում է, և այն թերությունները, որոնք բացահայտվել էին քառօրյա պատերազմի ժամանակ, ի չիք են արվում:
Պարոն Իսագուլյանը նշեց, որ հաճախ է լինում Արցախում, և տեսնելով, թե ինչպես են այնտեղ ամրացվում դիրքերը, թարմացվում զինտեխնիկան, զարմանում է՝ գալով Հայաստան և լսելով այստեղի պաշտոնյաների խոսակցությունները:
«Որոշ գործիչներ իշխանության դեմ պայքարը վերածել են պետականության դեմ պայքարի: ԱԺ-ից հնչում են այնպիսի հայտարարություններ, որոնք վնասում են մեր զինվորներին, նվաստացնում ապրիլյան պատերազմում զոհված զինվորների հերոսությունները»:
Կարճ ակնարկ կատարվեց նաև լրագրողի և պատգամավորի միջև տեղի ունեցած միջադեպին: Պարոն Իսագուլյանը, ձեռնպահ մնալով մեկնաբանություններ անելուց, նշեց, որ ավելի մտաhոգիչ է, երբ ապտակներ են տրվում պետականությանը:
Տաթև ՀԱՐՈՒԹՅՈՒՆՅԱՆ
