«Ողջունում եմ…կարծում եմ՝ որքան շատ քաղաքական ուժեր ու կուսակցություններ միավորվեն, արդյունքներով ավելի լավը կլինեն»,-Aravot.am-ի հետ զրույցում անդրադառնալով ՔՊ, «Հանրապետություն» եւ «Լուսավոր Հայաստան» կուսակցությունների դաշինքին, ասաց ԱԺ պատգամավոր, «Ռեֆորմիստներ» կուսակցության ղեկավար Վահան Բաբայանը:
Հարցին, թե հասարակությունը չի՞ դժվարանա ընդդիմադիր ճակատների միջեւ ընտրություն կատարելու հարցում, Վահան Բաբայանն այսպես արձագանքեց. «Ընդդիմությունն էլ ունի իր 50 երանգները: Չենք կարող միանգամից մեկ ընդդիմություն ձեւավորել: Փորձը ցույց է տալիս, որ դա անհնար է, մոտեցումներն ու ծրագրերը տարբեր են»:
Անդրադառնալով ԲՀԿ նախկին առաջնորդ Գագիկ Ծառուկյանի վերադարձին՝ Վահան Բաբայանը նկատեց. «Բնական է, որ նրա վերադարձով քաղաքական դաշտում կլինեն վերադասավորումներ, բայց թե մոբիլիզացիան ինչպիսին կլինի, սպասենք, քանի որ Գագիկ Ծառուկյանի հայտարարությունը չի եղել»:
Լուիզա ՍՈՒՔԻԱՍՅԱՆ
