Բարսելոնի գլխավոր փողոցներից մեկը` La Rambla-ն, որտեղ զբոսաշրջիկների հոսքը երբեք չի դադարում, եւ որն իր նշանակությամբ ասես մեր Հյուսիսային պողոտան լինի, գիշերային ժամերին վերածվում է տարօրինակ տոնավաճառի: Հիմնականում աֆրիկացի ներգաղթյալները ասֆալտին փռած սպիտակ սավանների վրա շարած` վաճառում են գողացված ու կեղծված բրենդների պայուսակներ, կոշկեղեն եւ զանազան աքսեսուարներ:
Ու վայ այն անցորդին, եթե հանկարծ աչքի տակով նայի վաճառվող «ապրանքին»` անօրինական առեւտրով զբաղվող այս մարդիկ անմիջապես վրա են տալիս ու համոզում էժան պարագաներ գնել: Փողոցային առեւտուրը, սակայն, կարող է ամեն վայրկյան ընդհատվել, եթե որեւէ ոստիկան մոտենա: Սակայն ի տարբերություն երեւանյան փողոցներում անօրինական առեւտրով զբաղվողների՝ սեւամորթ երիտասարդներն ավելի հնարամիտ են, անմիջապես քաշում են հատուկ հարմարեցված թելը, ու սավանը վերածվում է ապրանքն իր մեջ թաքցնող պարկի: Այդպես ավելի հեշտ է «ծլկելը»:
Կարդացեք նաև
Լուսանկարը` ԳՈՀԱՐ ՀԱԿՈԲՅԱՆԻ
«Առավոտ»
13.12.2016
