Պաշտպանության նախարար Վիգեն Սարգսյանն ԱԺ-ում իր ամփոփիչ ելույթում անդրադարձավ 1000 դրամ պարտադիր վճարի մասին պատգամավորների քննադատություններին:
Նա ասաց, որ ցանկացած հայտարարություն անելիս, մեղադրանք առաջադրելիս պետք է զգույշ լինել ԱԺ-ում. «Երբ տնտեսագիտության դոկտոր պրոֆեսորի կողմից առաջարկ է արվում ժամկետային զինծառայողի համար աշխատավարձ սահմանել, որին ես կողմ կլինեի որպես ՊՆ նախարար, նա պետք է հաշվետվություն տա իրեն, որ իր առաջարկած հարցի գինը նույնչափ է, որքան եղել է իր ղեկավարած կառավարության պետական բյուջեն ամբողջությամբ: Եթե այսօր այդպիսի առաջարկ կարելի է անել, դա գնահատական է այս տարիների մեր երկրի ունեցած առաջընթացի, նաեւ այս կառավարության հաջողությունների»:
Նախարարի այս խոսքն ուղղված էր Հրանտ Բագրատյանին: Պարոն Բագրատյանը հորդորել էր այնպիսի քաղաքականություն տանել, որ մահացածներին չհերոսացնեն, ողջերին գնահատեն:
Կարդացեք նաև
Վիգեն Սարգսյանն էլ ասաց, որ եթե համեմատեն այն ժամանակ սպայի աշխատավարձը եւ հիմա իրենց տված աշխատավարձը, որը նույնպես ցածր է, ակնհայտ է տարիների ընթացքում աճի դինամիկան:
Նախարարի խոսքերով՝ ապրիլյան զոհերի մասին են խոսում. «Ես ձեզ խնդրում եմ, մի՛ խոսեք զոհերի մասին, խոսեք հերոսների մասին, չի՛ կարելի հերոսին զոհ սարքել, որովհետեւ դա ամենակարճ ճանապարհն է բանակում չծառայելու մոտեցումը տարածելու»:
Լեւոն Զուրաբյանը քննադատել էր, որ պարտադրանք է սա, ոչ թե հնարավորություն: Վիգեն Սարգսյանը պատասխանեց, որ երբ ինքնաթիռում պարտադրում են ամրագոտի կապել, հնարավորություն են տալիս փրկվելու, այնպես որ, պարտադրանքն ու հնարավորությունը պետք չի հակադրել:
Նախարարը վերջում հայտարարեց, որ չի անդրադառնա Զարուհի Փոստանջյանի ելույթին. «Իմ հայերենը չի ներում շատ շիտակ լինել պատասխանի մեջ՝ առանց հայհոյանք օգտագործելու: Իսկ դաստիարակությունս չի թույլ տալիս անել երկրորդը: Բայց քաղաքական սելֆիների մշակույթը բանակի մասին խոսելիս պետք է վերացնել: Շատ ավելի վտանգավոր է քաղաքական գործիչը, որը սելֆի է անում այս ամբիոնում, քան այն շոու բիզնեսի ներկայացուցիչը, որ սելֆի է անում խրամատում»:
Նախարարը հայտարարեց, որ հիմնադրամն այնպես է աշխատելու, որ բոլորը հպարտ են լինելու՝ կողմ քվեարկելու համար եւ ինքը այս օրենքի լիարժեք կատարման նժարին դնում է իր քաղաքական կենսագրությունը եւ ապագան:
Հռիփսիմե ՋԵԲԵՋՅԱՆ
