ԱՄՆ նորընտիր նախագահ Դոնալդ Թրամփը երկրի պետքարտուղարի պաշտոնում ընտրել է ExxonMobil խոշորագույն նավթային ընկերության ղեկավար Ռեքս Թիլերսոնին: Այս մասին հաղորդում է BBC-ն:
Թրամփի երդմնակալության արարողությունը տեղի կունենա 2017թ. հունվարի 20-ին: Դրանից հետո նա պաշտոնապես կոնգրեսի քննարկմանը կներկայացնի կառավարության անդամների թեկնածությունները:
Ռեքս Թիլերսոնը 64 տարեկան է: Նա ավարտել է Տեխասի համալսարանը, շուրջ 4 տասնամյակ աշխատել է ExxonMobil-ում, որտեղ սկսել է որպես ինժեներ, իսկ 2006թ.-ից գլխավորում է ընկերությունը:
Թրամփի շտաբի տարածած հաղորդագրության մեջ ասվում է, որ Թիլերսոնը պետք է «ամրապնդի տարածաշրջանի կայունությունը և կենտրոնանա ԱՄՆ ազգային անվտանգության տեսանկյունից առանցքային շահերի վրա»:
Կարդացեք նաև
Չնայած Թիլերսոնը դիվանագիտական աշխատանքի փորձ չունի, հայտարարության հեղինակները համոզված են, որ նրան կօգնի «համառությունը, հարուստ փորձը և աշխարհաքաղաքականության խորը ըմբռնումը»:
Թիլերսոնը երկար տարիներ աշխատել է Ռուսաստանի հետ, Ռուսաստանի նախագահ Վլադիմիր Պուտինի կողմից արժանացել է «Բարեկամության շքանշանի»:
Exxonmobil-ը 1995թ.-ից մեծ ներկայություն ունի Ադրբեջանում: AIOC (Azerbaijan International Operating Company) միջազգային կոնսորցիումում (որը շահագործում է երեք խոշոր հանքավայրեր՝ «Ազերին», «Չիրագը» և «Գյունեշլին») Exxonmobil-ն ունի 8 տոկոս մասնաբաժին:
Պատրաստեց՝ Վիկտորյա ԱՆԴՐԵԱՍՅԱՆԸ
