«Կայունացած ընտանիքս քայքայվեց, որդիս ստիպված բռնեց գաղթի ճամփան` իրանց սին խոստումների պատճառով: Տղաս աշխատող տղա էր, ասեց պապա` մենք անդունդն ենք գնում»,-հուզմունքը կոկորդում խեղդելով ասում է Հայկազ Ասատրյանը, որը «վարկերի տակ մնացած» Աղավնաձորի գյուղացիներից մեկն է:
Այսօր աղավնաձորցի գյուղատնտեսը նույնպես մասնակցում էր Միասնություն համազգային շարժման նախաձեռնած վարկերի տրամադրմանն առնչվող հիմնախնդիրների քննարկմանը: Տույժ ու տուգանքով Հայկազ Ասատրյանի վարկը եկել հասել է 2 միլիոն 600 հազարից ավելին եւ օրական էլ 5 հազարից ավելի դրամով այն ավելանում է:
Իրավաբան Գեւորգ Պետրոսյանի խոսքերով, բանկային ոլորտում մի շարք խոչընդոտներ կան, որոնք դժվարացնում են ոչ միայն գործարարների այլեւ քաղաքացիների կյանքը. «Երբ բանկոմատը քարտը կուլ է տալիս, հինգ օր է տեւում մինչեւ տալիս են, բայց, երբ վարկդ մեկ օր ուշացնում ես, ամբողջ բանկով ընկած ման են գալիս քեզ»:
Կարդացեք նաև
Ըստ մեկ այլ մասնակցի, մեր երկրում վարկային բեռ ասվածն ուղիղ իմաստով է եւ իսկապես բեռ է դառնում գործարարի համար, որը բիզնեսը զարգացնելու փոխարեն զբաղվում է վարկային բեռը հաղթահարելու խնդիրներով:
ԵՊՀ քաղաքացիական իրավունքի ամբիոնի վարիչ Վահրամ Ավետիսյանը գտնում է, որ վարկը նման է թմրանյութի. «Վարկերից սկսում են կախվածության մեջ ընկնել եւ մենք ունենում ենք այն պատկերը, ինչը որ այսօրվա իրականությունում արդեն իսկ առկա է: Եթե Երեւան քաղաքի շենքերի վիճակագրությունը հանենք, կտեսնենք, որ շենքերի բնակարանների 70 տոկոսը գրավադրված է: Գյուղերում էլ գրավադրված հողատարածքների ճնշող մեծամասնությունն արդեն իսկ վաճառքի է դրված»:
Վահրամ Ավետիսյանի խոսքերով, հատկապես գյուղերում բոլորը բոլորին երաշխավոր են կանգնում եւ վերցրած վարկերն էլ նպատակային չեն օգտագործում:
Վահրամ Ավետիսյանի խոսքի մանրամասները` տեսանյութում
Ջրառատ գյուղի բնակիչ, գյուղատնտես Արման Ղուկասյանի խոսքերով, բանկը վարկը տալիս է եւ այլեւս չի հետաքրքրվում, թե այդ վարկով բիզնե՞ս են անում, թե` ռեստորանում քեֆ անում:
Մանրամասները` տեսանյութում
Հայաստանի գործատուների հանրապետական միության նախագահ Գագիկ Մակարյանի տվյալներով, 10 հազար 49 Ա/Ձ արդեն լուծարվել են: Եվ այս պահի դրությամբ էլ 700 միլիոն դոլարի անշարժ գույք է գրավադրված: Նրա ներկայացմամբ, մարդիկ բիզնես են գրանցում, որ վարկ վերցնեն, բայց այդ վարկերը ոչ նպատակային են ծախսում:
Պարոն Մակարյանը նաեւ խնդիր է համարում, որ բանկերը վարկը տալիս, երբ գրավ են պահանջում, անշարժ գույքը գնահատող ընդամենը 3-4 ընկերության հետ են աշխատում: Մինչդեռ տասնյակ ընկերություններ լիցենզիա ունեն. «Բանկը չի հարգում պետության տված լիցենզիան: Իսկ իրենց նախընտրած կազմակերպությունները երեք անգամ էժան են գնահատում գործարարի գույքը եւ բիզնեսի համար անհրաժեշտ վարկն այդպես էլ չի կարողանում գործարարը վերցնել»:
Լուսինե ԲՈՒԴԱՂՅԱՆ
Բանկերը աշխատում են խաղատների սկզբունքով՝երբեք չեն պարտվում….