«Այն համագործակցությունները, որոնք միտված են հզորացնելու Ադրբեջանի ռազմական ուժերը, բնականաբար, մեզ պետք է մտահոգեն»,-Aravot.am-ի հետ զրույցում անդրադառնալով տեղեկություններին, որ Իսրայելը եւ Ադրբեջանը պատրաստվում են փաստաթղթով ամրագրված ռազմական դաշինք ստեղծել եւ ժամանակակից սպառազինություն մատակարարել, ասաց ԱԺ փոխնախագահ Էդուարդ Շարմազանովը:
«Ղարաբաղը կոնֆլիկտ ունի Ադրբեջանի հետ, եւ սպառազինությունների մրցավազքը, որը վարում է Ադրբեջանը, մտահոգիչ է ոչ միայն մեզ, այլեւ համանախագահների համար: Այն երկրներին եւ կառույցներին, որոնք շահագրգիռ են տարածաշրջանային կայունության գործում, դա պետք է մտահոգի: Կարծում եմ՝ գոնե համբուրգյան հայտարարությունները կոչ են ոչ թե խաղաղության, այլ պատերազմի: Եթե դրանից հետո Ադրբեջանը փորձում է նաեւ Իսրայելի հետ ռազմական գործակցությունը խորացնել, չենք կարող ողջունել, բայց դա մեզ համար ինդիկատոր պետք է լինի, որ մենք էլ հզորացնենք մեր սպառազինությունը»,-հավելեց Էդուարդ Շարմազանովը:
Լուիզա ՍՈՒՔԻԱՍՅԱՆ
