Ղարաբաղում իշխանության ներկայացուցիչները ցույց են տվել, որ մարդիկ հեռադիտակներ են գնել, ուղարկել բանակ: Հետո էլ, իմանալով, որ այդ հեռադիտակները չի օգտագործվում, ասել են՝ բա ինչի՞ չի օգտագործվում: Պարզվել է՝ այդ հեռադիտակներն ունեն ինֆրակարմիր ճառագայթ, որ հակառակորդի համար տեսանելի է դարձնում թիրախը:
Այսօր ԱԺ-ում ԲՀԿ խմբակցության ղեկավար Նաիրա Զոհրաբյանը նորից արծարծեց «Մարտիկ» հիմնադրամի փողերի հարցը:
Նա մեջբերեց նախարարի խոսքը, որ «Մարտիկ» հիմնադրամի փողերը ապահով պահած են եւ հարցրեց. «Ես գիտեմ, որ ապահով պահված են բանկերում: Իսկ ինչո՞ւ է ապահով պահած, երբ ապրիլյան պատերազմում հաշմանդամ դարձած զինվորներն այսօր լրջագույն կարիք ունեն տարատեսակ վիրահատությունների: Օրինակ բերեմ Դանիելին, որի մայրը ամեն շաբաթ զանգահարում է թե՛ ինձ, թե՛ ձեզ: Գիտեք, որ նա գլխի խնդիր ունի, ինչո՞ւ է ապահով պահվում տարբեր բանկերում՝ ԼՂՀ փոխվարչապետի կողմից ղեկավարվող հիմնադրամի փողերը, երբ զինվորները ունեն վիրահատության կարիք ոչ թե ՀՀ-ում, այլ՝ արտերկրում»:
Կարդացեք նաև
ՀԱԿ խմբակցության պատգամավոր Նիկոլ Փաշինյանն էլ, իր ելույթում խոսելով 1000 դրամ պարտադիր վճարի մասին օրենքի նախագծից, ուշագրավ դեպք պատմեց՝ բանակին հասցեագրված իբր թե օգնություններից. «Մեր բանակը բարեգործության օբյեկտ չի: Մեր բանակը կարեկցանքի օբյեկտ չի, բայց այսօր կան մարդիկ, ակտիվիստներ, որ բանակի համար հանգանակություններ են տանում, իրեր են տանում, էս-էն են տանում: Այո, բայց դա, կներեք, ոնց որ մենք վերցնենք մի կարկատանի կտոր ու ասենք՝ տեսեք մեր շալվարի համար ինչ կարկատան ենք ճարել: Այդ հանրային ակտիվիստները, որոնք զբաղվում են այդ գործով, թող իրենք հավաքվեն մի տեղ, հիմնադրամ ստեղծեն, թող իրենք լինեն հոգաբարձուների խորհուրդը, թող ՊՆ-ի ներկայացուցիչն էլ գա, ներկայացնի ծախսերի առաջնահերթությունների ցուցակը, որ ում մտքով ինչ անցնի…Այո, շատ մարդիկ ապրիլյան պատերազմի օրերին շատ մեծ միջոցներ տվեցին, բայց ում մտքով ինչ անցավ՝ առնում էր: Ղարաբաղում Ղարաբաղի իշխանության ներկայացուցիչները ցույց են տվել, որ մարդիկ հեռադիտակներ են գնել, ուղարկել բանակ: Հետո էլ, իմանալով, որ այդ հեռադիտակները չեն օգտագործվում, ասել են՝ բա ինչի՞ չի օգտագործվում: Պարզվել է՝ այդ հեռադիտակներն ունեն ինֆրակարմիր ճառագայթ, որ հակառակորդի համար տեսանելի է դարձնում թիրախը»:
Նիկոլ Փաշինյանն ասաց, որ մեծ հարգանքի են արժանի այն մարդիկ, որոնք բանակին մատակարարում են կոշիկով, քնապարկով եւ այլն, բայց բանակը չպետք է դառնա բարեգործության օբյեկտ, զոհվածի ընտանիքն էլ չպետք է դառնան կարեկցանքի սուբյեկտ:
Հռիփսիմե ՋԵԲԵՋՅԱՆ
