Դեկտեմբերի 11-ին ՀՀ սփյուռքի նախարար Հրանուշ Հակոբյանը, Լիբանանում ՀՀ դեսպան Սամվել Մկրտչյանի ուղեկցությամբ Բեյրութի Հայ ավետարանական համագումարների կենտրոնում՝ ՔՋԱԿ-ում (Քրիստոնեական Ջանից ամառային ճամբար), հանդիպել է Հայ ավետարանական եկեղեցու հովիվների, կրթական խորհրդի, վարժարանների տնօրենների, հասարակական գործիչների և եկեղեցիների ներկայացուցիչների հետ:
ՄԱՀԱԵ-ի (Մերձավոր Արևելքի Հայ ավետարանական եկեղեցի) միության կենտրոնական մարմնի ատենապետ, Հայկազյան համալսարանի նախագահ, վերապատվելի Փոլ Հայդոստյանը ներկայացրել է ՔՋԱԿ-ի կողմից կատարվող աշխատանքները, ուր հարյուրավոր մանուկներ, պատանիներ և երիտասարդներ են դաստիարակվում: Նա կարևորել է կառույցի բազմաբնույթ և սերտ համագործակցությունը Սփյուռքի նախարարության հետ: Ողջունելով ներկաներին՝ նախարար Հրանուշ Հակոբյանը արժևորել է ՔՋԱԿ-ի ՄԱՀԱԵ-ի միության և Հայ ավետարանչական ընկերակցության հայապահպան գործունեությունը:
Նույն օրը Սփյուռքի նախարարը մասնակցել է Բեյրութի «Թեքեյան» մշակութային միության հովանավորությամբ, ՌԱԿ «Զարթոնք» օրաթերթի կողմից կազմակերպված Լիբանանի Թեքեյան մշակութային միության համահիմնադիր, ՀԲԸՄ-ի վետերան անդամ, ՌԱԿ վաստակաշատ ներկայացուցիչ Գերսամ Ահարոնյանի ծննդյան 100-ամյակին նվիրված հանդիսությանը:
Կարդացեք նաև
Միջոցառմանը ներկա են եղել նաև Լիբանանում ՀՀ դեսպան Սամվել Մկրտչյանը, Մեծի Տանն Կիլիկիո Կաթողիկոսության ներկայացուցիչ Նորայր եպիսկոպոս Աշկարյանը, Ավետարանական համայնքից՝ վերապատվելի Փոլ Հայդոստյանը, Լիբանանի Կաթողիկե համայնքի ներկայացուցիչ Գևորգ եպիսկոպոս Ասատուրյանը և այլք:
«Զարթոնք» օրաթերթի նախկին խմբագրի կյանքն ու գործունեությունը ներկայացրել է նրա գործի շարունակողը՝ գլխավոր խմբագիր Սևակ Հակոբյանը:
ՀՀ սփյուռքի նախարար Հրանուշ Հակոբյանը՝ կարևորելով հայրենանվեր ազգային գործիչների շարքում Գերսամ Ահարոնյանի դերն ու ավանդը Սփյուռքի կազմավորման և հայկական տպագիր մամուլի պահպանման ու զարգացման գործում, մասնավորապես ասել է. «ՌԱԿ-ի պաշտոնաթերթ «Զարթոնք»-ի խմբագրի պատասխանատու պաշտոնը ստանձնելով՝ Գերսամ Ահարոնյանն իր փորձառությամբ ու աշխատասիրությամբ, կուտակած գիտելիքներով նպաստեց թերթի զարգացմանը, դրսևորեց ուրույն դիմագիծ և հակառակ Լիբանանում տիրող պատերազմական իրավիճակին՝ օրաթերթը նրա գլխավորությամբ շարունակեց անխափան գործել: Ազգային նվիրյալ գործիչը հիմք ընդունելով լեզվի պահպանման հրամայականը, նոր դրոշմ թողեց սփյուռքահայ մամուլի ձևավորման վրա»:
***
ՀՀ սփյուռքի նախարար Հրանուշ Հակոբյանը Բեյրութի Հակոբ Տեր-Մելքոնյան համերգասրահում մասնակցել է ՀՀ սփյուռքի նախարարության հովանավորությամբ և Լիբանանում ՀՀ դեսպանության, «Նոր սերունդ» մշակութային միության, «Թեքեյան» մշակութային միության, ՀԲԸՄ Հայ երիտասարդաց ընկերակցության և «Համազգային» հայ կրթական և մշակութային միության աջակցությամբ կազմակերպված օպերային երգչուհի Լեոնորայի (Արևիկ Թանաշյան) մենահամերգին:
Երգչուհին Սեթո Բաղդասարյանի նվագախմբի նվագակցությամբ ներկայացրել է ժողովրդական և ազգային երգերի շարք և մենահամերգից ստացված ողջ հասույթը նվիրաբերել է սիրիահայերի օգնության նպատակներին:
Սփյուռքի նախարար Հրանուշ Հակոբյանը շնորհավորել է ներկաներին Հայաստանի Հանրապետության անկախության 25-ամյակի առիթով: Նա բարձր է գնահատել Լեոնորայի նախաձեռնությունը և ներկայացրել է այն աշխատանքները, որոնք Հայաստանի Հանրապետությունն իրականացրել է հայրենիքում հաստատված սիրիահայերի հիմնախնդիրների լուծման և նրանց ինտեգրման ուղղությամբ, նշելով. «Սիրիան և սիրիահայությունը ծանր օրեր ապրեցին և դեռ շարունակում են ապրել: Այդ ծանր օրերին նրանց կողքին էր նաև լիբանանահայությունը: Դուք ամեն ինչ արեցիք, որ մոտ 10-15 հազար սիրիահայերն իրենց լավ զգան այս երկրում: Հայրենիքն իր հերթին գրկաբաց ընդունեց շուրջ 22.000 սիրիահայերի և արեց հնարավորինը, որպեսզի նրանք հաստատուն կանգնեն իրենց սեփական հողի վրա»:
***
Հրանուշ Հակոբյանը Լիբանանում ՀՀ դեսպան Սամվել Մկրտչյանի հետ այցելել է ՀԲԸՄ Դեմիրճյան կենտրոն՝ ՀԲԸՄ տիկնանց հանձնախմբի կողմից իրականացվող Հայկական ավանդական սուրբծննդյան ցուցահանդես-տոնավաճառ, որի բացումը կատարվել էր դեկտեմբերի 9-ին, ցուցադրված էին հայկական ավանդական ձեռարվեստի, կերպարվեստի նմուշներ, ուտեստներ, անուշեղեն, Ամանորի զարդարանք, կանացի զարդեր և տոնը խորհրդանշող այլ պարագաներ:
Սփյուռքի նախարարը շնորհավորել է լիբանանահայերին գալիք Սուրբ Ծնունդի և Ամանորի կապակցությամբ՝ մաղթելով, որ 2017-ը լինի խաղաղության տարի:
ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ՍՓՅՈՒՌՔԻ ՆԱԽԱՐԱՐՈՒԹՅՈՒՆ
ՄԱՄՈՒԼԻ ԵՎ ՀԱՍԱՐԱԿԱՅՆՈՒԹՅԱՆ ՀԵՏ ԿԱՊԵՐԻ ՎԱՐՉՈՒԹՅՈՒՆ
