«ԼՂՀ հակամարտությունը ՀԱԿ-ի առաջնահերթություններից մեկն է»,-այսօր ԼՂՀ հակամարտության կարգավորումը և «Անջատում հանուն փրկության» սկզբունքը խորագրով քննարկման ժամանակ ասաց ԱԺ ՀԱԿ խմբակցության ղեկավար Լևոն Զուրաբյանը:
Նա հիշեցրեց, որ այդ սկզբունքն առաջին անգամ հնչեցվեց Լիսաբոնում 1996 թվականին ԵԱՀԿ գագաթնաժողովում:
«Այդ ժամանակ Հայաստանը միջազգային աննախադեպ ճնշման տակ ընկավ, քանի որ միջազգային հանրությունը առաջարկեց ԼՂ հիմնախնդրի մի լուծում, որով ԼՂ-ին առաջարկվում էր Ադրբեջանի կազմում ստանալ բարձրագույն ինքնակառավարման կարգավիճակը: Այդ գագաթնաժողովում Լեւոն Տեր-Պետրոսյանն ասաց` մեր խորին համոզմամբ, ԼՂ հիմնախնդիրը Ադրբեջանի կողմից առաջարկված սկզբունքների հիման վրա լուծելու դեպքում ԼՂ-ի բնակչության վրա կախված կլինի ցեղասպանության կամ բռնի տեղահանման մշտական սպառնալիքը»,-ասաց պարոն Զուրաբյանը:
«Սումգայիթի, Կիրովաբադի և Բաքվի հակահայկական ջարդերի, ինչպես նաեւ Արցախի 24 գյուղերի բնակչության տեղահանության փորձը, ամենայն ակներեւությամբ ցույց է տալիս, որ Ադրբեջանը չի կարող ԼՂ բնակչության անվտանգության երաշխիքներ ապահովել, հետեւաբար այն կարծիքին ենք, որ նոր ողբերգության բացառման միակ հնարավորությունը ԼՂ ժողովրդի ինքնորոշման հարգումն է»,-Լեւոն Տեր-Պետրոսյանի ելույթից եւս մի հատված մեջբերեց պարոն Զուրաբյանը:
Կարդացեք նաև
Նա ընդգծեց, որ այդ ելույթում առաջին նախագահը ուղիղ հղում չարեց «անջատում հանուն փրկության» սկզբունքին, բայց հենց դա նկատի ուներ:
Պարոն Զուրաբյանի խոսքով, գլխավոր հարցն էլ հենց այդ է` արդյոք ինքնորոշման իրավունքը նշանակում է նաեւ անջատում այն պետությունից, որից փորձում է մի ամբողջ ժողովուրդ անջատվել:
Նա շեշտեց, որ ԼՂ հիմնահարցի լուծման հիմքում ընկած հարցերը կապված են միջազգային իրավունքի սկզբունքների հետ, տարածքային ամբողջականության և ինքնորոշման իրավունքի սկզբունքների միջև եղած հակասություններով:
Արփինե ՍԻՄՈՆՅԱՆ
