Ռուսաստանի արտգործնախարար Սերգեյ Լավրովը Համբուրգում ընթացող ԵԱՀԿ անդամ-երկրների արտգործնախարարների խորհրդի նիստի շրջանակում տեղի ունեցած մամուլի ասուլիսում հերթական անգամ մեկնաբանել է Ռուսաստանի և ԵԱՀԿ ՄԽ համանախագահների դիրքորոշումը Լեռնային Ղարաբաղի հակամարտության կարգավորման հարցում: Մամուլի ասուլիսն ուղիղ եթերով հեռարձակվում է ԵԱՀԿ կայքում:
Արտգործնախարարը, մասնավորապես, հիշեցրել է Վիեննայի և Սանկտ Պետերբուրգի գագաթաժողովներում ձեռք բերված պայմանավորվածությունները և նշել, որ այդ հարցում դեռևս կողմերի համաձայնություն չկա:
«Պայմանավորվածությունները վերաբերում էին առաջին հերթին նրան, որ անհրաժեշտ է վերահաստատել կրակի դադարեցման ռեժիմը: Դա արվեց, բայց, ցավոք, խախտումները շարունակվում են, և մենք բարձր ենք գնահատում ԵԱՀԿ դերը շփման գծում մոնիտորինգների անցկացման գործում: Եվ պայմանավորվածությունները վերաբերում էին ԵԱՀԿ դիտորդների թվի ավելացմանը»,- ասել է Լավրովը:
«Եվ այո՛, մենք կարծում ենք, որ այդ պայմանավորվածությունները պետք է ամրապնդվեն ԵԱՀԿ որոշումներում, բայց դրա համար անհրաժեշտ է համաձայնություն. համաձայնություն ԵԱՀԿ դիտորդների ավելացման ֆիզիկական թվի վերաբերյալ, ինչպես նաև այն հարցի շուրջ, թե որտեղ պետք է նրանք տեղակայվեն: Ես, ինչպես և շատերը, կարծում եմ, որ նրանք պետք է տեղակայվեն շփման գծում: Բայց, կրկնում եմ, համաձայնություն դեռ չկա»,- հավելել է Ռուսաստանի արտգործնախարարը:
Կարդացեք նաև
Պատրաստեց Վիկտորյա ԱՆԴՐԵԱՍՅԱՆԸ
