ՀՀ տնտեսական զարգացման եւ ներդրումների նախարարի տեղակալ Գարեգին Մելքոնյանն այսօր խորհրդարանում «ՀՀ արտաքին քաղաքականության տնտեսական բաղադրիչը» թեմայով խորհրդարանական լսումների ժամանակ մանրամասներ հայտնեց բանակցությունների փուլում գտնվող ՀՀ-ԵՄ շրջանակային համաձայնագրի առեւտրային բաղադրիչի մասին: Նշեց, որ առեւտրային ներդրումների մասով բանակցությունները մի քանի փուլով արդեն իսկ կայացել են եւ ընդգրկում են 12-13 ուղղություններ:
«Խոսքը առեւտրի գրեթե բոլոր ուղղությունների, այդ թվում՝ մաքսային հարցերի, ապրանքի առեւտրի, մտավոր սեփականության պաշտպանության, պետական գնումների մասին է: Մենք այս հարցերը դիտարկում ենք ոչ միայն մեր տնտեսվարողի տեսանկյունից, այլեւ միջազգային ինտեգրացիոն ձեւաչափերում ՀՀ-ի ստանձնած պարտավորությունների տեսանկյունից»,-ասաց Գարեգին Մելքոնյանը:
Նա կարեւորեց ՀՀ-ԵՄ ընդհանուր ավիացիոն գոտու համաձայնագրի շուրջ նախատեսվելիք բանակցությունները. «Համոզմունք ունեմ, որ հաջորդ տարի հնարավոր կլինի ստորագրել համաձայնագիրը, որը կնպաստի ԵՄ երկրների հետ ավիացիոն փոխադրումների կարգավորմանը եւ ազատականացմանը, ինչն էլ կբերի մրցակցության աճի: ԵՄ-ն ՀՀ-ի համար մնալու է առեւտրային հիմնական գործընկեր, քանի որ ԵՄ-ն խիստ գնողունակ միասնական շուկա ունի»:
Լուիզա ՍՈՒՔԻԱՍՅԱՆ
