«ԵԱՀԿ-ն առաջին հերթին անվտանգության ոլորտի կազմակերպություն է: Անվիճելի է, որ տնտեսությունն անվտանգության բաղադրիչն է»,-խորհրդարանում այսօր «ՀՀ արտաքին քաղաքականության տնտեսական բաղադրիչը» թեմայով լսումների ժամանակ հայտարարեց ԵԱՀԿ երեւանյան գրասենյակի ղեկավար Արգո Ավակովը:
Նա տեղեկացրեց, որ 2017թ. ՀՀ-ում գրասենյակի գործունեությունն ուղղված է լինելու հետեւյալ խնդիրներին՝ բարելավել բիզնեսի միջավայրը եւ խթանել օտարերկրյա ներդրումները: Ըստ Ավակովի՝ գրասենյակի՝ ՀՀ-ում իրականացվելիք ծրագրերը ենթադրում են, օրինակ, մաքսային ընթացակարգերի դյուրացում:
«Կիրականացվի «ՀՀ ներդրումային դարպաս» ծրագիրը, որի շրջանակում ՄԱԿ-ի փորձագիտական օժանդակությամբ կբարելավվի հայկական ծրագրերի ներդրումային գրավչությունը օտարերկրյա կառույցների համար: Վիետնամում, Վենեսուելայում եւ մի շարք այլ երկրներում իրականացրած նմանօրինակ ծրագրերը ցույց են տվել, որ կարելի է հիսուն տոկոսով կրճատել ներդրողներին ներկայացվող պահանջների թիվը, իսկ էլեկտրոնային համակարգերի միջոցով՝ ընթացակարգերն ավելի մատչելի դարձնել: ԵԱՀԿ գրասենյակը շարունակելու է օժանդակել նման նախաձեռնությունների իրականացմանը ՀՀ-ում»,-հավելեց ԵԱՀԿ պաշտոնյան:
Լուիզա ՍՈՒՔԻԱՍՅԱՆ
