«Ի հեճուկս ՀՀ Սահմանադրության 80-րդ հոդվածի, Դուք նախորդ քառօրյայի հարցուպատասխանին չէիք մասնակցում, եւ գտնվում էիք Մոսկվայում: Կարո՞ղ է սա նշանակել, որ ամեն անգամ, երբ ընտրություն լինի ՀՀ Սահմանադրության եւ Մոսկվայի միջեւ, Դուք ընտրություն եք կատարելու հօգուտ Մոսկվայի»,- այսօր ԱԺ-կառավարություն հարցուպատասխանի ժամանակ ՀԱԿ խմբակցության պատգամավոր Նիկոլ Փաշինյանն այսպիսի հարց ուղղեց վարչապետ Կարեն Կարապետյանին:
Վարչապետը նախընտրեց չպատասխանել՝ ասելով, որ պատգամավորը հավանաբար պատասխան չի ակնկալում: Փաշինյանը նաեւ առիթը բաց չթողեց՝ ճշտելու՝ Մոսկվայում այդ այցելության ժամանակ արդյոք ինքը առաջարկե՞լ է ամերիկանո սուրճն անվանել ռուսիանո:
Կարեն Կարապետյանը շրջանցեց նաեւ այս հարցը:
Նիկոլ Փաշինյանը վարչապետին հարցրեց՝ գազի սակագինը հիմա իջնում է, բայց կարո՞ղ է ինքը երաշխավորել, որ ընտրություններից հետո իր արդեն հարազատ կուսակցությունը՝ ՀՀԿ-ն, երբ ընտրվեն, գազի սակագները չեն բարձրանալու, կամ դրա դիմաց մենք չենք վճարելու որեւէ ռազմավարական օբյեկտով, ինչի փորձն արդեն մենք ունեցել ենք:
Կարդացեք նաև
Կարեն Կարապետյանը պատասխանեց հստակ եւ միանշանակ՝ գազի գինը ընտրություններից հետո չի բարձրանալու, գազի գնի դիմաց որեւէ ռազմավարական օբյեկտ չեն տալու:
Հռիփսիմե ՋԵԲԵՋՅԱՆ
