Կենդանաբանության և հիդրոէկոլոգիայի գիտական կենտրոնի տնօրեն Բարդուղ Գաբրիելյանը, ամփոփելով տարին, մտահոգություն հայտնեց, որ 2016-ին որսագողության դեպքերն ավելացել են:
«Հայելի» ակումբում լրագրողների հետ հանդիպմանը պարոն Գաբրիելյանը տեղեկացրեց, որ այս տարի Սևանա լճում սիգի պաշարը չի ավելացել: Նա փաստեց. «Որսագողության դեպքերն ավելացել են, ինչը վտանգում է ոչ միայն սիգը, այլև մյուս ձկնատեսակները»: Բարդուղ Գաբրիելյանը հիշեցրեց, որ անցյալ տարի սիգի արդյունագործական պաշարը եղել է 430 տոննա, այս տարի` 450, ինչը էական ավելացում չէ, գրեթե նույնն է:
Պարոն Գաբրիելյանը նշեց, որ իրենք առաջարկել են ուժեղացնել հսկողությունը ձվադրման շրջանում՝ նոյեմբերի 25-ից մինչև հունվարի 10-ը, բայց նախարարությունը որոշել է արգելք դնել դեկտեմբերի 1-ից. «Դեկտեմբերի 2, 3-ին տեսել եմ վաճառքի հանված սիգ: Դա նշանակում է, որ արգելքը պատշաճ չի իրականացվում»:
Ըստ պարոն Գաբրիելյանի՝ երկրորդ արդյունագործական ձկան՝ կարասի պաշարները ևս նվազել են. «Հիմնական պատճառը որսի ուժեղացումն է, վերջին տարիներին խոշոր ձկների արտահանումը և մակաբույծները»:
Կարդացեք նաև
Պարոն Գաբրիելյանը փաստեց, որ քիչ թե շատ բարվոք վիճակում է իշխան ձկնատեսակը, սակայն դա ևս քիչ է. «Քանի դեռ ձկնատեսակը չունի բնական վերարտադրություն, նրա քանակությունը համարել վերականգնված չի կարելի, իսկ իշխանը շարունակում է մնալ առանց բնական ձվադրավայրերի, քանի որ մեր գետերը չունեն համապատասխան միջավայր»:
Տաթև ՀԱՐՈՒԹՅՈՒՆՅԱՆ
