Տրանսպորտի, կապի եւ տեղեկատվական տեխնոլոգիաների նախարարությունը լուծարում է «Տրանսպորտային փոխադրումներ» ՊՈԱԿ-ը: Այս մասին տեղեկանում ենք կառավարության դեկտեմբերի 8-ի նիստի օրակարգից:
Այս ՊՈԱԿ-ը լուծարվում է, ինչպես նշված է որոշման նախագծում, քանի որ դրա գործառույթները հնարավոր է իրականացնել նախարարության կառուցվածքային եւ առանձնացված ստորաբաժանումների կողմից՝ առկա ռեսուրսներով:
«Արդյունքում ՊՈԱԿ-ի տարեկան պահպանման համար հատկացված 26.3 միլիոն դրամից ՀՀ պետական բյուջեի ծախսերը կկրճատվեն 22 միլիոն դրամով (ներառյալ 9 հաստիքները): Մնացած 4.3 միլիոն դրամը՝ 300.0 հազար դրամ՝ անվճար երթեեւեկության վկայականների պատրաստման, 2500.0 հազար դրամ՝ Միջպետական բեռնափոխադրող կազմակերպությունների թույլտվության ձևաթղթերի տպագրության եւ 1500.0 հազար դրամը՝ տեխզննության կտրոնների տպագրման համար, հատկացվի ՀՀ տրանսպորտի, կապի եւ տեղեկատվական տեխնոլոգիաների նախարարությանը, «Տրանսպորտային փոխադրումներ» ՊՈԱԿ-ից վերջինիս փոխանցված գործառույթներն իրականացնելու համար»,-նշված է հիմնավորման մեջ:
Նելլի ԲԱԲԱՅԱՆ
