«Դաշնակցությունից դուրս եկածները շարունակում են կրել ՀՅԴ գաղափարախոսությունը»,- Ազգային ժողովում լրագրողների հետ զրույցում ասաց ՀՅԴ խմբակցության ղեկավար Արմեն Ռուստամյանն՝ անդրադառնալով այն լուրերին, որ «Ժառանգություն» խմբակցության պատգամավոր Ռուբիկ Հակոբյանը պատրաստվում է վերադառնալ ՀՅԴ: «Նրանք, ովքեր եղել են դաշնակցության մեջ, պատահական չեն եղել, բոլորն էլ ընդունել են դաշնակցության գաղափարախոսությունը եւ հիմա եթե դուրս են այդ կառույցից, այնուամենայնիվ այդ գաղափարախոսությունը կրողներն են»,- շարունակեց Արմեն Ռուստամյանը:
Ռուբիկ Հակոբյանի`ՀՅԴ վերադառնալու մասին, ասաց` մեր միջեւ քննարկումներ չեն եղել:
Արմեն Ռուստամյանն ասում է, որ ՀՅԴ-ի կարգապահական որոշակի ռեժիմի մեջ չտեղավորվելով շատերն են դուրս եկել ՀՅԴ-ից, այդ թվում նաեւ Գարեգին Նժդեհը, Անդրանիկը. «Բայց դա չի նշանակում, որ նրանք չեն շարունակել իրականացնել նույն գաղափարախոսությունը»:
Ինչ վերաբերում է ՀՀԿ-ի հետ դաշինք կազմելուն եւ ՀՅԴ-ում ֆինանսական խնդիրներին, Արմեն Ռուստամյանն ասաց. «Հիմա դժվար է ասել, քանի որ շատ հստակեցումների խնդիրներ կան: Այս պահին մեր որոշումը հստակ է՝ մենք ընտրություններին գնալու ենք առանձնաբար»: Արմեն Ռուստամյանը, սակայն, չի բացառում, որ այդ որոշումը փոփոխության ենթարկվի:
Կարդացեք նաև
Լրագրողներից մեկի հարցին՝ ՀՀԿ-ի հետ համագործակցությունը չի՞ սասանել իրենց մշտական 5-6 տոկոս ընտրազանգվածի հնարավորությունը, Արմեն Ռուստամյանն ասաց. «Դաշնակցության մշտական տոկոսը երբեք չի սասանվել, որովհետեւ հենց դա բնորոշ է գաղափարական կուսակցություններին, այո նրանց տոկոսը կարող է շատ թռիչքային փոփոխություն չունենա, բայց կայուն է»:
Նա վստահեցնում է, որ իրենք նվազագույն շեմը հաղթահարելու խնդիր չունեն: Արմեն Ռուստամյանը հերքում է նաեւ դրսի կառույցների հետ տարաձայնությունները եւ ֆինանսական խնդիրները:
Այլ մանրամասները`տեսանյութում
Նելլի ԳՐԻԳՈՐՅԱՆ
