ԱԺ-ում Տեղական ինքնակառավարման մարմինների մասին օրենքում փոփոխությունների նախագծի քննարկումը շարունակվում է:
ՀԱԿ խմբակցության քարտուղար Արամ Մանուկյանը տարածքային կառավարման եւ զարգացման փոխնախարար Վաչե Տերտերյանին առաջարկեց. «Հիմնադրամները հանեք, Երեւանի հիմնադրամը խայտառակություն է, կոռուպցիայի, ստվերի մի մեծ աղբյուր, որը հաճախ ավելի է, քան Երեւանի բյուջեն»:
Ըստ Արամ Մանուկյանի, քաղաքապետարանից մի թուղթ ստանալու համար այդ հիմնադրամի թրի տակով պետք է անցնես: Նա հորդորեց արգելել, հանել այդ հիմնադրամները:
Արամ Մանուկյանը վստահեցրեց, որ «Երեւանի հիմնադրամին մուծելու գործարքների 99 տոկոսը անում են այն քաղաքացիները, որոնք դիմում են քաղաքապետարան՝ շինարարության թույլտվություն, ձեւափոխում, ինչ-որ բան ստանալու համար: Իրենք ստիպված են այդ մուծումները անում»:
Կարդացեք նաև
Ըստ պատգամավորի, 1-2 տոկոսն է միայն, որ բարերար է եւ վճարում է հիմնադրամին:
ԱԺ փոխխոսնակ Հերմինե Նաղդալյանը միջամտեց. «Ինչո՞ւ մենք մեզ նման իրավունք վերապահենք, որ բազմաթիվ քաղաքացիներ, որոնք իրականում բարերար են, ուզում են իրենց միջոցներով օգտակար ինչ-որ բան արած լինեն, այդպես ուլտիմատումային կերպով հայտարարել, որ դա ստիպողաբար է: Որտեղի՞ց է ձեզ այդ ինֆորմացիան: Չի կարելի, չէ,՞ այդպես անվերապահ հայտարարություններ անել»:
Արամ Մանուկյանը տեղից սկսեց բղավել ու հակադարձել՝ ասելով, որ չի կարելի Նաղդալյանի միջամտությունը, ռեպլիկները:
Հռիփսիմե ՋԵԲԵՋՅԱՆ
