«Բան է փոխվել՝ նա այլեւս կտրուկ ընդդիմադիր չէ, ինչպիսին դարձել էր մի պահ՝ իր հրաժարականին նախորդող կարճ ժամանակահատվածում: Նա ասաց՝ հրաժարական է տալիս, որ արյունահեղություն չլինի, հետեւաբար՝ այդ ժամանակ ԲՀԿ-ն կտրուկ ընդդիմություն էր դարձել»,-«Պոստ Սկրիպտում» մամուլի ակումբում այսօր խոսելով ԲՀԿ նախկին առաջնորդ Գագիկ Ծառուկյանի՝ քաղաքականություն վերադարձի մասին, ասաց քաղաքագետ Հայկ Մարտիրոսյանը:
«Նա իրեն ժամանակին հեռանալու մեղմ ասած՝ կոչ արած նախագահի հետ ջերմ հարաբերությունների մեջ է, հետեւաբար՝ քաղաքականություն վերադառնալով՝ այլ խնդիրներ է լուծում՝ մասնավոր եւ քաղաքական որոշ խմբերի քաղաքական առումով սպասարկելու նպատակներ»,-հավելեց Մարտիրոսյանը:
Ըստ նրա, Գագիկ Ծառուկյանի վերադարձով ՀՀ քաղաքական կյանքում ցնցող փոփոխություններ չեն սպասվում: Քաղաքագետը չմեկնաբանեց իրավապաշտպան Ավետիք Իշխանյանի կարծիքը, թե Ծառուկյանը կատարելու է Կարեն Դեմիրճյանի դերը: «Մեկնաբանելու իմաստ չեմ տեսնում»,-ասաց Հայկ Մարտիրոսյանը:
Լուիզա ՍՈՒՔԻԱՍՅԱՆ
