Անկարան Մոսկվայի հետ համաձայնության է եկել ռազմատեխնիկական ոլորտում համագործակցության շուրջ: Այս մասին «Ինտերֆաքսին» տված հարցազրույցում հայտարարել է Թուրքիայի վարչապետ Բինալի Յըլդըրըմը:
Թուրքիայի կառավարության ղեկավարը նշել է, որ երկու երկրների միջև ռազմական համագործակցությունը դանդաղում էր՝ կապված ռուս-թուրքական հարաբերությունների սառեցման հետ:
«Մենք կոնկրետ նախագծերի վերաբերյալ չենք խոսել, բայց սկզբունքորեն քննարկել ենք այդ հարցերը: Երկու կողմերն էլ տեսնում են, որ մեր հարաբերությունների զարգացումն անհրաժեշտություն է: Մենք ռուսական կողմի հետ համաձայնության ենք եկել՝ լրացնել մեկ տարվա ընթացքում՝ այն ցավալի պահից մինչ օրս բաց թողնվածը»,- ասել է նա:
Յըլդըրըմն ընդգծել է, որ ռազմատեխնիկական համագործակցությունից բացի՝ կողմերը պատրաստվում են վերականգնել համագործակցությունը նաև մյուս ոլորտներում:
Կարդացեք նաև
«Մենք ունենք նաև մեծ էներգանախագծերը, դրանք պետք է արագացնել: Դրանց գումարվել են նաև տիեզերական և պաշտպանական ոլորտներում հարցեր: Բնականաբար, այդ նոր հարցերի շրջանակներում կլինեն նոր նախագծեր»,- ասել է Թուրքիայի վարչապետը:
Հիշեցնենք, Բինալի Յըլդըրըմը դեկտեմբերի 6-ին Մոսկվայում բանակցություններ է վարել Ռուսաստանի վարչապետ Դմիտրի Մեդվեդևի հետ:
Պատրաստեց՝ Վիկտորյա ԱՆԴՐԵԱՍՅԱՆԸ
